Qazim Laçi është shprehur i kënaqur me paraqitjen e Shqipërisë në fitoren 2-0 ndaj Finlandës në “Air Albania”. Mesfushori kuqezi vlerësoi lojën e skuadrës, rastet e krijuara dhe mentalitetin e treguar në fushë, ndërsa foli edhe për ndryshimet që ka sjellë trajneri i ri, Rolando Maran, në raport me periudhën e Sylvinhos.

Në prononcimin pas ndeshjes, Laçi u ndal fillimisht te një mundësi që pati për të shënuar, duke theksuar se për të më e rëndësishme është suksesi i ekipit sesa statistikat personale.

“Ndonjëherë duhet të jesh më i qetë në zonë. Kur u futa në zonë, e kisha mendjen te pasimi. Nuk mërzitem edhe kur nuk shënoj. E rëndësishme është fitorja. Kur shënoj, është bonus për mua. Rëndësi ka fitorja”, deklaroi mesfushori.

Laçi vlerësoi më pas paraqitjen e përgjithshme të kuqezinjve, duke theksuar se skuadra po tregon një futboll cilësor dhe ka mentalitetin e duhur për të arritur objektivat.

“Kemi treguar një futboll shumë të mirë. Kemi shfrytëzuar çdo aksion. Mund të kishim shënuar edhe më shumë gola. Kemi mentalitetin e duhur”, u shpreh ai.

Në fund, futbollisti foli edhe për ndryshimet mes drejtimit të Sylvinhos dhe atij të Rolando Maran, duke nënvizuar se grupi po punon për të rritur nivelin e lojës në të dyja fazat.

“Sylvinho me Maran? Që nga ndeshja e parë zyrtare me Maran, mundohemi të japim maksimumin dhe të luajmë një futboll të bukur. Patjetër që duhet të jemi në nivelin e duhur të përqendrimit. Po punojmë për një mbrojtje të fortë dhe një sulm sa më efikas”, përfundoi Qazim Laçi.