Bashkia Tiranë vijon transformimin e transportit publik, futen në shërbim autobusët e parë 100% elektrik
Bashkia e Tiranës po avancon me hapa konkretë drejt një sistemi transporti më ekologjik, duke investuar në teknologji të pastra, zgjerimin e transportit publik dhe përmirësimin e infrastrukturës urbane. Autobusët elektrikë dhe hibridë, si dhe projekti i transportit të shpejtë, janë pjesë e strategjisë për reduktimin e ndotjes dhe rritjen e cilësisë së jetës në kryeqytet.
Transformimi i transportit publik drejt mjeteve me emetime të ulëta dhe zero është një nga drejtimet kryesore të politikave të Bashkisë së Tiranës për zhvillimin e qëndrueshëm urban. Në këtë kuadër, linja urbane “Unaza” përfaqëson një nga shembujt konkretë të këtij procesi, me 5 autobusë 100% elektrikë dhe 26 autobusë hibridë në flotën e saj.
Përdorimi i autobusëve elektrikë mundëson lëvizjen pa emetime ndotëse gjatë funksionimit, ndërsa teknologjia hibride kontribuon në reduktimin e konsumit të karburantit dhe të ndotjes krahasuar me autobusët konvencionalë. Këto investime synojnë jo vetëm modernizimin e flotës, por edhe krijimin e një alternative më të pastër dhe më tërheqëse për qytetarët.
Një tjetër zhvillim i rëndësishëm është projekti BRT (Bus Rapid Transit), për të cilin, në bashkëpunim me Bankën KfW dhe GIZ, ka nisur puna përgatitore dhe procesi ndodhet në fazën e projektimit. Projekti synon të dyfishojë kapacitetin e transportit të udhëtarëve dhe të krijojë korsi të dedikuara për autobusët, duke rritur shpejtësinë, efikasitetin dhe besueshmërinë e transportit publik.
Në fazën fillestare, ndërhyrjet parashikohen të përqendrohen në linjat kryesore Unaza, Kinostudio–Kombinat dhe Tirana e Re, të cilat përbëjnë korridore të rëndësishme të lëvizjes së përditshme në kryeqytet.
Paralelisht me investimet në mjete dhe infrastrukturë, transporti publik në Tiranë ka shënuar rritje të konsiderueshme të aktivitetit. Sipas të dhënave të Bashkisë, kilometrat e përshkuara në shërbim janë rritur me 86% që nga viti 2021, ndërsa numri i pasagjerëve është rritur me 66%.
Një komponent i rëndësishëm i këtij shërbimi mbetet edhe mbështetja sociale. Çdo muaj, rreth 44 mijë pensionistë dhe 22 mijë studentë përfitojnë udhëtim falas me transportin publik, duke lehtësuar lëvizjen dhe shpenzimet e këtyre kategorive.
Përmes zgjerimit të flotës ekologjike, zhvillimit të projektit BRT dhe rritjes së kapaciteteve të shërbimit, Tirana po orienton gjithnjë e më shumë politikat e saj të mobilitetit drejt një modeli modern dhe të qëndrueshëm. Synimi është që transporti publik të bëhet një alternativë gjithnjë e më konkurruese ndaj automjeteve private, duke kontribuar në uljen e ndotjes, lehtësimin e trafikut dhe krijimin e një qyteti më të shëndetshëm për të gjithë.
