Ambasada e Shteteve të Bashkuara të Amerikës në Beograd njoftoi se ndihmës sekretari amerikan i Shtetit, Brendan Hanrahan, u takua me përfaqësues të Listës Studentore në Serbi. Sipas njoftimit, qëllimi i takimit ishte përgëzimi i përfaqësuesve për suksesin në zgjedhje dhe diskutimi i mundësive për bashkëpunim në të ardhmen.
Misioni diplomatik amerikan theksoi se Uashingtoni mbetet i gatshëm të bashkëpunojë me udhëheqjen e ardhshme të Serbisë për realizimin e prioriteteve të përbashkëta. Në deklaratë u shprehën gjithashtu pritshmëritë për vijimin e Dialogut Strategjik ndërmjet SHBA-së dhe Serbisë dhe për thellimin e mëtejshëm të partneritetit bilateral.
Vizita e Hanrahanit u zhvillua në një moment politik kyç për Serbinë, e cila po përgatitet për ndërrimin e pushtetit pas zgjedhjeve parlamentare të 25 tetorit. Lista Studentore fitoi 140 nga 250 vendet në Kuvend, duke siguruar shumicën e nevojshme për formimin e qeverisë, ndërsa lista e udhëhequr nga ish-presidenti Aleksandar Vučiç mori 103 mandate. Ky rezultat i dha fund sundimit shumëvjeçar të Partisë Përparimtare Serbe, e cila ishte në pushtet që nga viti 2012.
Sipas njoftimeve, fitorja e studentëve erdhi pas një vale protestash kundër korrupsionit dhe mungesës së llogaridhënies. Ndryshimi i pushtetit pritet të përbëjë një provë për politikën e jashtme të Serbisë, e cila gjatë udhëheqjes së Vučiçit ka synuar të ruajë marrëdhëniet me Perëndimin, por pa hequr dorë nga lidhjet e ngushta me Rusinë dhe Kinën.
Përmes takimit dhe deklaratave të Ambasadës, SHBA-ja shprehu gatishmërinë për bashkëpunim me udhëheqjen e re dhe interesin për vazhdimin e dialogut dhe forcimin e bashkëpunimit dypalësh ndërsa Serbia përgatitet për tranzicionin politik. (Top Channel)