Kryetari i PD-së, Sali Berisha, u bëri thirrje të gjitha forcave politike opozitare të mbështesin votimin e detyrueshëm për qytetarët, ndërsa u shpreh kategorikisht kundër çdo forme të numërimit elektronik të votave.
Gjatë diskutimeve për reformën zgjedhore në mbledhjen e grupit parlamentar të PD-së, Berisha argumentoi se votimi i detyrueshëm do të pengonte praktikat e blerjes së të drejtës së votës përmes presionit ndaj qytetarëve që të mos marrin pjesë në zgjedhje.
Ai solli si shembuj Australinë dhe Belgjikën, ku votimi është i detyrueshëm, duke theksuar se kjo praktikë kufizon mundësinë që zgjedhësit të paguhen për të qëndruar në shtëpi dhe për të mos votuar.
“Pra, ne duhet të kërkojmë votim të detyrueshëm për qytetarët”, deklaroi Berisha.
Sa i përket numërimit elektronik, kreu i PD-së u shpreh kundër kësaj forme, duke pretenduar se ajo ka shfaqur probleme të mëdha jo vetëm në Shqipëri, por edhe në vende të tjera të botës.
“Jemi kategorikisht kundër çdo forme numërimi elektronik, pasi ky lloj numërimi është shfaqur me probleme të mëdha në shumë vende. Në Shqipëri po e po, por edhe në vende të tjera të botës. Asnjë votim elektronik”, u shpreh ai.
Berisha foli edhe për votën e diasporës, duke theksuar se PD nuk e kundërshton të drejtën e emigrantëve për të votuar, por kërkon që mënyra e zbatimit të saj të diskutohet dhe të garantojë siguri e transparencë.
“Për votën e diasporës duhet të diskutojmë gjerësisht. Ne nuk e kundërshtojmë kurrë të drejtën e tyre të votës, por mënyra e zbatimit duhet parë, të gjejmë mënyrat më të sigurta dhe më transparente”, deklaroi Berisha.a.b
