Nëse macja juaj mjaullin, gërvisht derën ose ju pret përpara saj sa herë që mbyllni një dhomë, kjo sjellje nuk është thjesht një kapriço.
Sipas ekspertëve të sjelljes së maceve, pas këtij reagimi fshihen disa arsye, nga kurioziteti dhe instinkti territorial deri te lidhja emocionale me pronarin.
1. Kurioziteti i tyre natyror
Macet duan të dinë gjithçka që ndodh përreth tyre. Një derë e mbyllur i pengon të shohin se çfarë po ndodh në anën tjetër, duke u krijuar ndjesinë se mund të humbasin diçka interesante.
2. Dëshira për të kontrolluar territorin
Shtëpia është territori i maces dhe ajo ka nevojë të kontrollojë hapësirat ku jeton. Një derë e mbyllur mund ta bëjë të ndihet sikur i është kufizuar papritur një pjesë e territorit të saj, ku më parë kishte qasje të lirë.
3. Nuk u pëlqen të humbasin kontrollin
Macet e kanë të rëndësishme të kenë mundësi zgjedhjeje dhe kontroll mbi mjedisin e tyre. Një derë e mbyllur ua heq këtë mundësi. Edhe nëse nuk duan të hyjnë në dhomë, dëshirojnë ta dinë se çfarë po ndodh brenda saj.
4. Kanë nevojë për shoqëri
Ndryshe nga ideja se macet janë kafshë krejtësisht të pavarura, studimet tregojnë se shumë prej tyre e vlerësojnë jashtëzakonisht shumë shoqërinë njerëzore. Në një studim të vitit 2017, gjysma e 38 maceve të vëzhguara preferuan ndërveprimin me njerëzit përpara ushqimit, lodrave dhe aromave.
5. Pronari është burim sigurie
Një studim i publikuar në revistën shkencore "Current Biology" në vitin 2019 zbuloi se rreth 65 për qind e maceve të vëzhguara kishin krijuar një lidhje të sigurt me pronarët e tyre. Kjo do të thotë se prania e njeriut të tyre të besuar u jep siguri dhe qetësi.
6. Mund të vuajnë nga ankthi i ndarjes
Disa mace e kanë më të vështirë të qëndrojnë larg pronarëve. Një studim i vitit 2020, ku u përfshinë 223 mace, zbuloi se 13.5 për qind e tyre shfaqnin sjellje të lidhura me ankthin e ndarjes. Ndër shenjat më të zakonshme ishin mjaullima e tepërt, shkatërrimi i objekteve dhe urinimi jashtë kutisë së rërës.
Ekspertët paralajmërojnë se mjaullimat e forta dhe të vazhdueshme, veshët e ulur dhe fishkëllimat mund të tregojnë shqetësim më serioz.
Në këto raste rekomandohet konsultimi me veterinerin, për të përjashtuar edhe probleme të mundshme shëndetësore. /Telegrafi/
