Ravenna përgatitet të shohë në fushë Ronaldinhon, i rikthyer të luajë në moshën 46 vjeçare në derbin e së dielës me Forlì, ku ai pritet të nisë nga minuta e parë dhe ku biletat thuhet se janë shitur të gjitha. Para debutimit, Ronaldinho i jep një intervistë medias italiane, ku rikthen disa kujtime dhe shpjegon motivet e rikthimit.
Ai nis duke kujtuar golin kundër Interit me fanellën e Milanit, që e përshkruan si golin e tij të parë në Itali dhe një moment të veçantë që nuk e harron. Periudha te Milani, thotë, ka qenë e mrekullueshme për shkak të njerëzve, golave dhe kujtimeve të bukura. Për Ravenën, ai shprehet se dëshiron t’u dhurojë tifozëve gëzim, pasi ata e përjetojnë futbollin me shumë pasion.
Ronaldinho shpjegon se vendosi të kthehet për miqësinë me Ignazio Ciprianin, presidentin e Ravenës, dhe për projektet e përbashkëta për të ardhmen. Ai e përshkruan pjesëmarrjen si një mundësi për të përjetuar një moment unik dhe të paharrueshëm dhe shpreson që dita të jetë e veçantë edhe për futbollistët e tjerë. Rikthimi, thotë, e bën të lumtur pasi, pas mbylljes së karrierës, e ka rivlerësuar rrugëtimin dhe ndihet i plotësuar, por dëshiron të bëjë sërish diçka në futboll dhe t’u dhurojë tifozëve një ditë të bukur.
Pyetjes për simpatinë e tij globale ai i përgjigjet me modestinë se ndihet me fat që shumë e shohin si një figurë pozitive dhe një pikë reference, dhe është i kënaqur që ka pasur kolegë me karaktere krejt të ndryshme. Për golin e 300-të në karrierë thotë se për momentin nuk po mendon për të. Sa i përket kujtimit më të bukur te Milani, përmend shumë momente: golat, stërvitjet, Milanello, golin në derbi, shokët dhe fitoret.
Për të rinjtë, nuk i pëlqejnë krahasimet; përmend se ka shumë talent, duke veçuar brazilianët. Për Endrick-u thotë se është një djalosh që mund të luajë kudo në botë dhe që ka bërë mirë në kampionate si Franca, Brazili e Spanja. Për Ancelottin shpreh bindjen se është trajneri më i mirë në botë dhe se do të bëjë gjëra të mëdha. Kur e pyesin për driblimin më të bukur në karrierë, ai përgjigjet me rikthimin në fushë në moshën 46 vjeçare.