Raketa Starship e kompanisë SpaceX, e drejtuar nga Elon Musk dhe e cilësuar si më e fuqishmja në botë, ka arritur të hyjë në orbitën e Tokës gjatë fluturimit të saj të 15-të provë. Megjithatë, misioni nuk shkoi plotësisht sipas planit.
Raketa 124 metra e gjatë u lëshua nga baza hapësinore në Teksasin jugor. Pak minuta pas nisjes, një problem teknik detyroi kompaninë të anulonte përpjekjen për rikuperimin e përshpejtuesit Super Heavy.
Në vend që të kapej nga krahët mekanikë të platformës së lëshimit, përshpejtuesi përfundoi në Gjirin e Meksikës, ku gjatë rënies u përfshi nga një shpërthim i madh zjarri. SpaceX njoftoi se ende nuk dihen shkaqet që penguan rikuperimin.
Ndërkohë, anija Starship arriti me sukses orbitën e Tokës dhe pritet të kryejë 14 rrotullime rreth planetit, përpara kthimit të planifikuar të shtunën.
Gjatë misionit, ajo lëshoi në hapësirë edhe 26 satelitë të rrjetit Starlink.
Objektivi kryesor i SpaceX mbetet krijimi i një sistemi raketor plotësisht të ripërdorshëm, që do të ulte ndjeshëm kostot e udhëtimeve hapësinore. NASA synon të përdorë Starship për zbarkimin e astronautëve në Hënë, në kuadër të programit Artemis, ndërsa Elon Musk planifikon që në të ardhmen anija të transportojë njerëz edhe drejt Marsit.
Sfida e radhës për kompaninë është rikthimi dhe kapja e Starship në platformën e lëshimit, një manovër jashtëzakonisht e vështirë për shkak të shpejtësisë dhe temperaturave ekstreme gjatë hyrjes në atmosferë.