Asambleja Kombëtare e Partisë Socialiste, e zhvilluar këtë të shtunë me dyer të mbyllura, u paraqit publikisht si një mbledhje për organizimin e partisë dhe nisjen e përgatitjeve për zgjedhjet vendore. Por rrëfimi i publikuar nga disa media duke iu referuar burimeve brenda sallës, përshkruan një atmosferë shumë më të tensionuar. Deklaratat e raportuara mbeten të pakonfirmuara në mënyrë të pavarur, por përmbajtja e tyre ngre pyetje që meritojnë sqarim publik.
Sipas këtyre burimeve, Edi Rama ka mbajtur një fjalim të ashpër ndaj deputetëve dhe drejtuesve socialistë, duke i akuzuar se ishin tërhequr në momentet e presionit politik dhe të protestave. Pyetja që mësohet të ketë përsëritur ishte:
“Ku ishit ju kur Tirana u dogj?”
Më pas, sipas të njëjtit raportim, ai u është drejtuar të pranishmëve:
“Më latë vetëm, menduat se mbarova!”
“U zhdukët sepse menduat: iku ky…”
Nëse janë thënë në këtë formë, këto fjali tregojnë se përplasja ka prekur drejtpërdrejt marrëdhënien e besimit mes kryetarit dhe drejtuesve të partisë. Rama, sipas këtij rrëfimi, ka kërkuar llogari për mungesën e solidaritetit politik në një moment kur është ndier i braktisur nga të vetët.
Një pjesë e kritikave thuhet se është përqendruar te sjellja e socialistëve në rrjetet sociale:
“Ju bëhet qejfi kur në Instagram dhe Facebook shahet Taulant Balla”.
Por pjesa më e rëndë e raportimit lidhet me mënyrën se si Rama pretendohet të ketë përcaktuar raportin e tij me Partinë Socialiste dhe elektoratin:
“Nuk protestojnë kundër meje, por kundër jush. Nuk duan PS!”
“Ju keni vetëm logon, votat i kam unë. Jam më i madh se partia, pa mua jeni një mut!”
Kjo deklaratë e fundit, nëse konfirmohet, do të ishte thelbi politik i gjithë mbledhjes.
Burimet e përshkruajnë sallën në atë moment si të ngrirë, me shumë pak reagime. Sipas tyre, Taulant Balla, Belinda Balluku, Niko Peleshi, Albana Koçiu dhe Ervin Demo janë përmendur si referenca pozitive, duke mbetur jashtë valës së kritikave ndaj pjesës tjetër të të pranishmëve.
Veçanërisht e fortë, sipas raportimit, ka qenë mbështetja për Albana Koçiun:
“Albana është kryetarja që Tirana ka nevojë sot.”
Kjo fjali, nëse është e saktë, ka peshë përtej një vlerësimi personal. Ajo mund të lexohet si sinjal për përzgjedhjen politike në Tiranë, por nuk duhet ngatërruar me një kandidaturë të shpallur zyrtarisht. Në përfundim të Asamblesë u bë publik pozicionimi i Koçiut dhe Ervin Demos në drejtimin e strukturave socialiste të kryeqytetit.
Një tjetër pjesë e raportimit lidhet me kërkesën për të mbajtur të fshehta diskutimet. Sipas burimeve, Rama u ka thënë të pranishmëve:
“Do thoni vetëm se këtu ndezëm motorët për zgjedhjet bashkiake, se u fol për forcën e PS-së dhe për rrugën që do ta çojë Shqipërinë në Bashkimin Europian”.
Mbledhjet e mbyllura janë pjesë e jetës së partive. Megjithatë, kur raportohen përplasje për drejtimin, përfaqësimin dhe të ardhmen elektorale, komunikimi publik kërkon më shumë se një formulë të përgjithshme për unitetin. Socialistët kanë të drejtë të dinë çfarë vendimesh janë marrë dhe cilat janë arsyet politike të tyre.
Kjo vlen veçanërisht për Elisa Spiropalin. Rama ka kërkuar që ajo të mos marrë më pjesë në mbledhjet e Asamblesë:
“Elisa nga sot nuk shkel më në asnjë mbledhje Asambleje. Është vetëm anëtare e partisë, por kurrë në Asamble”.
Momenti tjetër i fortë i raportuar është përplasja me Pandeli Majkon. Sipas burimeve, pas një debati ku Rama e ka adresuar me tone të forta, por Pandeli Majko është ngritur në këmbë dhe ka thënë:
“Dua të them diçka që ju s’keni asnjëri guxim ta thoni, por të gjithë e mendoni: Tiranën e kemi të humbur. Nëse bëhen zgjedhje sot, ne nuk fitojmë!”
Paralajmërimi që i atribuohet Majkos nuk provon se PS-ja do ta humbë Tiranën. Ai shpreh një vlerësim politik që, nëse është bërë, meriton diskutim serioz brenda partisë. Një organizatë që përgatitet për zgjedhje duhet të jetë në gjendje të dëgjojë edhe parashikimin më të pakëndshëm dhe ta përballë atë me gjendjen në terren.