Ajo që ndodhi në Asamblenë Kombëtare të Partisë Socialiste ngre pikëpyetje jo vetëm politike, por edhe statutore.
Edi Rama kërkoi përjashtimin e Elisa Spiropalit dhe Plarent Ndrecës. Por kërkesa e tij nuk u hodh në votim. Gjatë diskutimeve pati kundërshtime dhe Asambleja nuk mori asnjë vendim përmes votës.
Kjo është çështja e parë. Si mund të konsiderohet i marrë një vendim për përjashtimin e dy anëtarëve, kur organi që duhej të shprehej për kërkesën nuk votoi?
Ka edhe një problem të dytë, që e bën situatën edhe më paradoksale.
Pas mbledhjes, Sekretari i Përgjithshëm i PS-së, Blendi Klosi deklaroi se Elisa Spiropali ishte anëtare e Partisë Socialiste, duke lënë tē kuptohej se nuk ishte vendosur për përjashtimin. Më pas, përmes një statusi në Facebook, korrigjoi deklaratën, dhe tha se Spiropali dhe Ndreca përjashtoheshin nga forumet e partisë, por jo nga anëtarësia në PS.
Mirëpo, edhe ky sqarim krijon dy probleme.
Së pari, Plarent Ndreca nuk rezulton të jetë anëtar i ndonjë forumi drejtues të PS-së. Atëherë, nga cili forum po përjashtohet?
Si mund të përjashtosh dikë nga një strukturë ku nuk është anëtar?
Ndërsa për Elisa Spiropalin çështja është edhe më komplekse. Sipas statutit të PS-së, deputetët socialistë janë anëtarë ex officio të Asamblesë Kombëtare. Pra, anëtarësia e saj në këtë organ buron nga statuti.
Atëherë, si mund të hiqet kjo e drejtë që ia njeh statuti?
Pra kemi një situatë të pazakontë: kryetari kërkon përjashtimin, Asambleja nuk voton, kërkesa kundërshtohet dhe Sekretari i Përgjithshëm shpall më pas përjashtimin nga forumet.
Nëse statuti nuk përcakton më kufijtë e vendimmarrjes dhe Asambleja nuk ka më nevojë të votojë për vendimet që i kërkon kryetari, atëherë cili është roli i saj?
Dhe, mbi të gjitha, çfarë vlere ka statuti në Partinë Socialiste?
