Pirro Dhima ka paraqitur dorëheqjen nga detyra e këshilltarit të ministrit grek të Sportit, Yiannis Vroutsis, vetëm disa orë pasi vëllai i tij, Odiseas Dhima, u arrestua nën dyshimet për përfshirje në një çështje me substanca të ndaluara.
Sipas mediave greke, legjenda e peshëngritjes e mori vendimin për arsye ndjeshmërie, pas arrestimit të vëllait të tij 58-vjeçar, i cili akuzohet se furnizonte sportistë me substanca të ndaluara për rritjen e performancës fizike.
Megjithatë, ministri grek i Sportit nuk e ka pranuar dorëheqjen. Sipas Protothema.gr, Vroutsis i ka bërë të qartë Pirro Dhimës se ai nuk mund të mbajë përgjegjësi për veprimet e një familjari, duke iu përgjigjur: “Çfarë lidhje keni ju me këtë?”.
Pirro Dhima vijon ndërkohë të mbajë edhe detyrën e sekretarit special në Federatën Greke të Peshëngritjes. Ish-kampioni olimpik është një prej emrave më të njohur të këtij sporti, me tri medalje të arta dhe një të bronztë në Lojërat Olimpike.
Vëllai i tij, Odiseas Dhima, u arrestua më 12 nëntor në një zonë të Atikës, nën dyshimin për shkelje të legjislacionit antidoping. Arrestimi erdhi pas një hetimi disa mujor, të zhvilluar në bashkëpunim me Organizatën Helenike Antidoping dhe Organizatën Kombëtare të Barnave.
Sipas raportimeve, 58-vjeçari është proceduar penalisht dhe çështja i është referuar hetuesit për vijimin e procedurave ligjore. Pirro Dhima nuk ka bërë deri tani një deklaratë publike për arrestimin e vëllait të tij.