Forcat evropiane kanë kontrolluar një anije cisternë që dyshohet se përdoret nga Rusia për të anashkaluar sanksionet perëndimore ndaj eksporteve të naftës. Shefja e diplomacisë së BE-së, Kaja Kallas, konfirmoi se anija lundronte me flamur të rremë dhe paralajmëroi masa të reja ndaj Moskës.
Forcat e Bashkimit Evropian kanë ndërhyrë në Mesdhe, ku kanë kryer një kontroll në bordin e anijes cisternë “MV Midag”, e dyshuar si pjesë e flotës sekrete që Rusia përdor për të shmangur kufizimet perëndimore mbi eksportin e naftës.
Operacioni u zhvillua të premten nga forcat detare të misionit të BE-së “Irini”. Konfirmimi për rezultatin e kontrollit erdhi këtë të diel nga shefja e diplomacisë evropiane, Kaja Kallas, e cila bëri të ditur se u verifikua përdorimi i një flamuri të rremë nga anija.
Kallas publikoi edhe fotografi nga ndërhyrja, duke theksuar se Bashkimi Evropian do të vijojë përpjekjet për të penguar aktivitetin e kësaj flote, si në det, ashtu edhe përmes kanaleve diplomatike.
“BE-ja do të vazhdojë të pengojë aktivitetin e flotës së fshehtë ruse në det dhe përmes mjeteve diplomatike”, shkroi ajo.
Krahas operacionit, Kallas njoftoi se ministrat e Jashtëm të vendeve anëtare të BE-së pritet të miratojnë të hënën një paketë të re sanksionesh ndaj Rusisë. Masat e parashikuara do të prekin bankat, blerësit dhe kompanitë që ndihmojnë në funksionimin e flotës sekrete.
Si funksionon flota sekrete ruse?
Për të transportuar naftën dhe për të shmangur kufizimet e vendosura nga vendet perëndimore ndaj sektorit të saj energjetik, Rusia mbështetet te një rrjet i gjerë anijesh cisternë. Këto mjete lundrimi përdorin skema të ndërlikuara pronësie, regjistrohen nën flamuj të shteteve të tjera dhe aplikojnë metoda të ndryshme për të fshehur origjinën e ngarkesave që transportojnë.
Kontrolli i “MV Midag” është një tjetër ndërhyrje e këtij lloji nga autoritetet evropiane. Në gusht, forcat e BE-së kishin kontrolluar edhe anijen cisternë “MV Sun” për të verifikuar flamurin nën të cilin lundronte. Po gjatë atij muaji, ndërhyrje ishte kryer edhe ndaj anijes “MV Toa Payoh”.
Operacioni detar “Irini” u krijua në mars të vitit 2020, fillimisht me qëllim mbikëqyrjen e zbatimit të embargos së Kombeve të Bashkuara për furnizimin me armë të Libisë, gjatë luftës së dytë civile në vend.
Mandati i tij përfshinte gjithashtu luftën kundër trafikimit të paligjshëm të armëve, mbledhjen e informacioneve për kontrabandën e naftës, pengimin e trafikimit të emigrantëve, si dhe trajnimin e institucioneve libiane përgjegjëse për zbatimin e ligjit dhe operacionet e kërkim-shpëtimit.
Në tetor, mandati i misionit u zgjat deri më 31 mars 2029. Krahas detyrave ekzistuese, atij iu shtua edhe mbrojtja e interesave të Bashkimit Evropian në Mesdhe dhe kufizimi i aktivitetit të flotës së fshehtë ruse.
Sipas BE-së, Mesdheu është shndërruar në një pikë strategjike për kalimin dhe transferimin e ngarkesave nga anijet që Rusia përdor për të anashkaluar sanksionet ndërkombëtare.