Ish-presidenti i Serbisë, Aleksandar Vuçiç, ka vënë në pikëpyetje arsyet përse përfaqësuesve të Listës Studentore iu lejua të hynin në Kosovë dhe të takoheshin me peshkopin Teodosije në Graçanicë. Ai pretendon se kryeministri Albin Kurti prej vitesh ia ndalon hyrjen në Kosovë atij dhe familjarëve të tij, edhe për vizita private.
Aleksandar Vuçiç ka reaguar lidhur me vizitën e përfaqësuesve të Listës Studentore në Kosovë, ku ata zhvilluan një takim me peshkopin Teodosije në Graçanicë. Ish-presidenti serb ka vënë në dyshim rrethanat në të cilat u lejua kjo vizitë, duke pretenduar se kryeministri Albin Kurti nuk e lejon prej vitesh atë dhe familjarët e tij të hyjnë në territorin e Kosovës.
“Unë prej vitesh nuk mund të hyj në Kosovë. As si qytetar, madje as ndonjë anëtar i familjes sime nuk mund të vijë privatisht, sepse Albin Kurti nuk e lejon këtë. Ndërsa atyre ua lejon”, deklaroi Vuçiç për “Nacionalni Magazin”, sipas KosovaPress.
Ai u ndal edhe te qëndrimet e përfaqësuesve të Listës Studentore, të cilët fillimisht kishin mohuar se udhëtimi i tyre në Kosovë ishte bërë në cilësinë e përfaqësuesve politikë. Megjithatë, sipas Vuçiçit, në një komunikatë të publikuar më vonë ishte bërë e ditur se peshkopi Teodosije i kishte pritur pikërisht si përfaqësues të kësaj liste.
“Ata e dinin shumë mirë dhe pikërisht për këtë e morën lejen, sepse e dinin”, u shpreh ish-presidenti serb.
Në fund, Vuçiç u bëri thirrje qytetarëve të reflektojnë mbi arsyet që, sipas tij, çuan në lejimin e hyrjes së përfaqësuesve të Listës Studentore në Kosovë, si dhe mbi faktin që Nenad Rashiçi i ka përgëzuar ata.