Boris Johnson tha se Lavrov e detyroi të pinte vodka, i përgjigjet Zakharova: Kishe edhe verë përpara

Përfaqësuesja zyrtare e Ministrisë së Jashtme ruse, Maria Zakharova, ka reaguar ndaj deklaratave të ish-kryeministrit britanik Boris Johnson, i cili pretendoi se gjatë një takimi në Moskë, ministri i Jashtëm rus Sergei Lavrov e kishte detyruar të pinte vodka pranë një oxhaku të ndezur.

Zakharova hodhi poshtë pretendimet e Johnsonit, duke deklaruar se ai kishte pasur mundësi të zgjidhte mes pijeve dhe se askush nuk e kishte detyruar të konsumonte vodka.

Sipas diplomates ruse, gjatë darkës Johnsonit i ishte ofruar edhe verë, por ai kishte preferuar vodkën.

“Ai mund të kishte zgjedhur verën që kishte përpara. Por secili zgjedh sipas shijes së tij. Më kujtohet ajo darkë. Johnson kërkonte vazhdimisht të hidhte më shumë”, deklaroi Zakharova.

Ajo komentoi gjithashtu vizitën e mëvonshme në Moskë të ish-kryeministres britanike Liz Truss, duke ironizuar atmosferën që, sipas saj, ajo kishte krijuar gjatë takimit në rezidencën Morozov.

Ndërkohë, Boris Johnson e kishte cilësuar më herët Lavrovin si një “njeri të tmerrshëm”, duke treguar për përvojën e tij gjatë takimit dhe duke pretenduar se ishte detyruar të pinte vodka pranë oxhakut të ndezur.