Pep Guardiola pritet të refuzojë ofertën e mundshme të Shteteve të Bashkuara të Amerikës për t’u emëruar përzgjedhës i ri i përfaqësueses, pas largimit të Mauricio Pochettinos.
Sipas gazetës britanike The Telegraph, trajneri spanjoll nuk e ka në plan rikthimin e menjëhershëm në futboll, pasi synon të marrë një pushim njëvjeçar pas përfundimit të aventurës së tij te Manchester City.
Federata Amerikane e Futbollit pritet ta kontaktojë Guardiolën në kuadër të kërkimit të pasuesit të Pochettinos, i cili është në rrugë për t’u bërë trajner i Manchester Unitedit, pasi të përfundojë angazhimet e tij me përfaqësuesen amerikane.
Megjithatë, 55-vjeçari duket se nuk është i gatshëm ta ndërpresë pushimin e planifikuar për të marrë drejtimin e një përfaqësueseje.
Guardiola më parë kishte refuzuar edhe mundësinë për të drejtuar Kombëtaren e Italisë, ndërsa interesim për të kishte shfaqur edhe Anglia, para se të emëronte Thomas Tuchelin në vitin 2024.
Kështu, Shtetet e Bashkuara mund të detyrohen të shqyrtojnë alternativa të tjera për të gjetur pasuesin e Pochettinos.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2026 Gazeta Online Insajderi - Të gjitha të drejtat e rezervuara.
