Inteligjenca artificiale harton përmbajtjen, ndërsa bot-et kryejnë punën e pistë. Së bashku, ato formojnë një ekip të fuqishëm për këdo që kërkon të orientojë një diskutim politik: një sistem gjeneron qindra komente të ndryshme brenda pak çastesh, ndërsa tjetri vërshon rrjetet sociale me to, duke përdorur profile që duket se u përkasin njerëzve të vërtetë. Pikërisht në këtë kontekst kanë dalë në pah, ditët e fundit, mesazhe të pazakonta – të evidentuara nga *la Repubblica* – nën postimet e partive dhe figurave politike italiane, përfshirë Matteo Salvini-n dhe Carlo Fidanza-n, si dhe eurodeputetë nga Partia Demokratike.
Njëri prej tyre thotë: "Nuk mund të shkruaj një mesazh që synon fyerjen e një partie të caktuar politike." Një tjetër mesazh, i cili u shfaq disa herë nën përmbajtjen e Lega-s, thotë: "Nuk mund të shkruaj një mesazh specifik që synon të bindë eurodeputetë specifikë që të mbështesin një propozim legjislativ." E gjetëm të postuar nga rreth pesëmbëdhjetë llogari të ndryshme duke përdorur të njëjtën foto profili, por emra përdoruesi të ndryshëm: një anomali që sugjeron profile të automatizuara të ndërtuara rreth të njëjtit identitet vizual. Ajo që më bën përshtypje është se ky formulim i dyshimtë është shumë i ngjashëm me atë në të cilin mbështetet chatbot për inteligjencën artificiale gjeneruese - sistemi është i aftë të prodhojë tekste që imitojnë shkrimin njerëzor - dhe refuzon kërkesat që shkelin rregullat e tij. Kjo ndodh kur atyre u kërkohet të sulmojnë një person ose të gjenerojnë përmbajtje që konsiderohet joetike.
Precedentë
Ende nuk dihet se kush bëri që ato mesazhe të shfaqeshin nën postimet e politikanëve italianë, e as se çfarë sistemi u përdor. Megjithatë, ka precedentë të studiuar vitet e fundit që mundësojnë rindërtimin e një mekanizmi të besueshëm. Një operator mund të përdorë një model të Inteligjencës Artificiale (IA) për të gjeneruar mesazhe dhe më pas të ngarkojë një "bot" — softuer i programuar për të kryer automatikisht veprime specifike në një ose më shumë llogari të rrjeteve sociale, qofshin ato reale apo fiktive — për t'i publikuar ato. Në këtë mënyrë, si krijimi ashtu edhe shpërndarja e përmbajtjes mund të ndodhin pothuajse pa asnjë ndërhyrje njerëzore. Megjithatë, nëse sistemi nuk arrin të dallojë një përgjigje standarde nga një refuzim i vetë "chatbot"-it, atëherë edhe ai mesazh refuzimi mund të publikohet gabimisht së bashku me komentet e tjera. Ky është një gabim që u dokumentua nga OpenAI në vitin 2024, pasi kompania identifikoi dhe bllokoi disa fushata të ndikimit politik, të lidhura me operatorë në Rusi, Kinë dhe Iran, si dhe me një firmë izraelite: në disa raste, mesazhet në të cilat modelet e IA-së kishin refuzuar t'u përgjigjeshin kërkesave të marra, përfunduan duke u publikuar në internet, të përziera me përmbajtjen propagandistike.
Rasti Navalny
Në dhjetor të vitit 2023, Elise Thomas, një studiuese në Institutin për Dialog Strategjik (ISD), vuri re një anomali në një postim të Alexei Navalny-t, kundërshtarit kryesor të Vladimir Putinit. Një llogari me emrin "Nikki" kishte postuar një përgjigje, në të cilën një sistem i inteligjencës artificiale shpjegonte se nuk mund ta përmbushte kërkesën, pasi ajo shkelte politikat e OpenAI-t kundër gjuhës së urrejtjes dhe ngacmimit të shënjestruar. Kjo ishte pjesë e një fushate të koordinuar kundër Navalny-t, bashkëpunëtores së tij Maria Pevchikh dhe Fondacionit të tyre Kundër Korrupsionit.
“Një evolucion”
Bot-et politike ekzistonin shumë kohë përpara ChatGPT-së, por ato zakonisht rishpërndanin tekste ose përmbajtje të përgatitura paraprakisht, të cilat ishin shumë më të thjeshta dhe më të përsëritura. Inteligjenca artificiale gjenerative e ka bërë më të shpejtë dhe më të lirë shumëfishimin e së njëjtës përmbajtje: dikush mund t’i japë një “chatbot”-i thelbin e një postimi dhe t’i kërkojë të gjenerojë dhjetë, njëqind apo edhe mijëra komente të ndryshme - qofshin pro apo kundër, në varësi të qëllimit.
"Ajo që po shohim është një evolucion, e jo një revolucion: ata që kryejnë këto operacione priren ta integrojnë inteligjencën artificiale në procedurat ekzistuese, në vend që të krijojnë të reja," tha Ben Nimmo, i cili drejton hetimet mbi operacionet e ndikimit në OpenAI.
"Me modelet gjenerative mund të prodhoni tekst shumë bindës, por pa një rrjet shpërndarjeje, ai nuk do të arrijë te askush. Prandaj, infrastruktura thelbësore e propagandës mbetet në thelb e njëjtë." Bot-et janë thelbësore për këdo që kërkon të ndikojë në debatin publik - qoftë në vendin e vet apo diku tjetër. Nga këndvështrimi i një politikbërësi, një sërë ndërhyrjesh të koordinuara mund të forcojnë në mënyrë artificiale konsensusin ose mospajtimin. Ky mekanizëm hyn në kategorinë e "kërcënimeve hibride" - një shqetësim si për NATO-n, ashtu edhe për BE-në.
Bot-et mund të jenë pjesë e këtyre strategjive duke mbetur të padukshme - derisa një dështim i inteligjencës artificiale të bëjë që mekanizmi të çedojë, duke zbuluar atë që fshihet pas tij: një fushatë e hartuar nga njerëzit për të manipuluar njerëz të tjerë, e zbuluar pikërisht nga ajo teknologji për të cilën kemi frikë se një ditë mund të kthehet kundër nesh./ La Repubblica









Komente
Komento