“Zgjerimi po ndodh në një mjedis shumë konkurrues”, komisionerja Kos: Kemi kundërshtarë që po pengojnë përparimin e vendeve kandidate

16/11/2026 11:11

Komisionerja europiane për Zgjerimin, Marta Kos, ka theksuar rëndësinë strategjike të zgjerimit të Bashkimit Europian, duke paralajmëruar për përpjekjet e Rusisë për të penguar këtë proces.

Gjatë Forumit të Zgjerimit në Bruksel, ajo bëri thirrje për një Europë më të bashkuar dhe më të fortë, që të jetë në gjendje të përcaktojë vetë të ardhmen e saj.

“Zgjerimi i sotëm po zhvillohet në një mjedis gjeopolitik shumë më konkurrues. Përballemi me kundërshtarë që duan të pengojnë këtë proces dhe të dëmtojnë vendet kandidate, por objektivi kryesor jemi ne, Bashkimi Evropian. Mbi të gjitha, Rusia, e cila dëshiron të përmbysë procesin e bashkimit evropian. Dhe ju e dini cila është përgjigjja jonë ndaj kësaj. Ne nuk do ta lejojmë një gjë të tillë të ndodhë.

Përkundrazi, le ta shfrytëzojmë këtë moment për të ndërtuar një Evropë më të madhe dhe më të fortë, e aftë për të përcaktuar vetë të ardhmen e saj. Çfarë Europe duam të jetojmë dhe t’u lëmë brezave të ardhshëm? Europa nuk mund t’ia lejojë vetes të qëndrojë në vend, ndërkohë që bota gjeopolitike po ndryshon në mënyrë kaq dramatike.

Nëse duam të formësojmë të ardhmen e Europës, a mund t’ia lejojmë vetes të mos e përfundojmë bashkimin e saj? Shikoni rreth kësaj salle. Sot kemi një pjesëmarrje të jashtëzakonshme: presidentë, kryeministra, ambasadorë, ministra, përfaqësues të medias dhe biznesit. Kjo i dërgon një mesazh botës: politika është rikthyer te zgjerimi. Dikur, zgjerimi ishte përgjigjja e Europës ndaj përfundimit të Luftës së Ftohtë dhe ne arritëm të pranonim me sukses 13 shtete të reja anëtare.

Sot, zgjerimi është sërish pjesë e një debati shumë më të gjerë për mënyrën se si do ta formësojmë të ardhmen e Europës, për të garantuar paqen, lirinë dhe mirëqenien për dekadat që vijnë. Këtë e shohim edhe te shpejtësia me të cilën disa vende kandidate po ecin përpara. Vetëm këtë vit kemi arritur më shumë rezultate se në çdo vit tjetër gjatë 25 viteve të fundit”, tha Kos mes të tjerash.

Top Channel