Një apel prekës për ndihmë vjen nga familja Sinanaj, nga fshati Suk i Roskovecit. 58-vjeçari Shpëtim Sinanaj po përballet me një betejë të vështirë me kancerin dhe aktualisht ndodhet i shtruar në Spitalin Universitar të Veronës, në Itali, ku ka nevojë për një ndërhyrje kirurgjikale urgjente.
Vajza e tij, Dorida Sinanaj, i është drejtuar shqiptarëve përmes një mesazhi prekës, duke kërkuar ndihmë për të siguruar shumën e nevojshme për kryerjen e operacionit.
Sipas familjarëve, tumori në mëlçi ka përmasa shumë të mëdha dhe ndërhyrja e nevojshme nuk mund të kryhet në Shqipëri.
Për këtë arsye, Shpëtimi është dërguar në Itali, por kostot e trajtimit janë tepër të larta për t'u përballuar nga familja. Situata është emergjente, pasi shuma e nevojshme duhet të mblidhet brenda kësaj jave.
Vajza e tij kërkon që shqiptarët të bashkohen dhe ta ndihmojnë të atin të ketë mundësinë të kryejë operacionin dhe të kthehet pranë familjes.
Çdo kontribut, sado i vogël, mund të bëjë diferencën.