Institucioni i Avokatit të Popullit hapi të hënën një zyrë në Mitrovicë të Veriut. Ajo synon t’ua lehtësojë qytetarëve qasjen në institucion dhe t’u ofrojë mbështetje banorëve të të katër komunave veriore.
Avokati i Popullit, Naim Qelaj, tha se vendimi erdhi pas kërkesave të përsëritura të qytetarëve. Sipas tij, gjatë takimeve me përfaqësuesit e institucionit, banorët kishin ngritur shqetësime për vështirësitë që hasnin për të marrë shërbimet e Avokatit të Popullit dhe kishin kërkuar një zyrë më pranë tyre.
Të lidhura
None found
Qelaj shpjegoi se, pas këtyre takimeve, ai dhe stafi vendosën të hapnin zyrën në Mitrovicë të Veriut për t’u shërbyer të gjithë qytetarëve. Ai bëri të ditur se zyra është e gatshme, do të funksionojë për pranimin e ankesave dhe do t’i mbajë dyert të hapura për qytetarët.
Drejtori i organizatës joqeveritare ACDC, Dushan Radakoviq, e përshkroi hapjen e zyrës si përfundim të një procesi të gjatë, në të cilin, krahas ACDC-së, janë angazhuar edhe katër apo pesë organizata të tjera joqeveritare që veprojnë në veri.
Sipas Radakoviqit, zyra që funksionon në komunë është aktive, por përballet me shumë raste dhe kërkesa të vazhdueshme. Ai tha se qytetarët u drejtohen për çështje të ndryshme Avokatit të Popullit, institucioneve përkatëse dhe organizatave joqeveritare. Për këtë arsye, ai e vlerësoi të nevojshme zyrën e re për të gjitha komunitetet që jetojnë e veprojnë në veri, jo vetëm për komunitetin serb.
Radakoviq theksoi gjithashtu rëndësinë e bashkëpunimit me Institucionin e Avokatit të Popullit dhe vlerësoi mbështetjen që ai u ka dhënë organizatave të shoqërisë civile. Duke folur për qëllimin e përbashkët të të pranishmëve, ai përmendi angazhimin për të drejtat e njeriut, një të ardhme më të mirë dhe kushte më të mira jetese për banorët e zonës.
Zëvendësi i Avokatit të Popullit, Srdjan Sentic, e cilësoi hapjen e zyrës një ditë të rëndësishme për demokracinë, të drejtat e njeriut dhe sundimin e ligjit në katër komunat veriore. Ai tha se prania e institucionit për qytetarët, organizatat joqeveritare, mediat dhe përfaqësuesit e organizatave ndërkombëtare dëshmon afërsinë e tij të vazhdueshme me qytetarët.
Sentiq shtoi se mbrojtja e sundimit të ligjit, e të drejtave të njeriut dhe e vlerave demokratike ka qenë në qendër të punës dhe mandatit të institucionit. Zyra e re, e vlerësuar si e rëndësishme për banorët e zonës, tashmë është në shërbim të tyre.







