Estonia po përgatit një plan emergjence që do t’i lejonte qeverisë të vazhdonte funksionimin edhe në rast të një pushtimi ushtarak nga Rusia, duke ruajtur drejtimin e vendit nga jashtë kufijve. Strategjia synon të garantojë vazhdimësinë e institucioneve edhe nëse infrastruktura fizike dhe qendrat e të dhënave në territor shkatërrohen ose bien në duart e forcave pushtuese. Sipas Politico, autoritetet po zhvillojnë një sistem dixhital që u mundëson zyrtarëve të aksesojnë shërbimet dhe aplikacionet shtetërore përmes një infrastrukture të sigurt cloud, të vendosur jashtë vendit.
Nisma, e quajtur hukukindlus (rezistencë ndaj fatkeqësive), bazohet pjesërisht në ambasadën dixhitale të Estonisë në Luksemburg, ku ruhen kopje rezervë të të dhënave më të rëndësishme. Qeveria synon që të dhënat jo vetëm të ruhen, por edhe të përdoren për administrimin e vendit gjatë një krize të rëndë, duke mundësuar që institucionet të punojnë nga jashtë territorit estonez. Alan Almere, këshilltar për arkitekturën dhe infrastrukturën e IT-së në Ministrinë e Drejtësisë dhe Çështjeve Dixhitale, tha: “Ne gjithashtu duhet të sigurohemi që të njëjtat të dhëna të mbeten të kuptueshme dhe të përdorshme edhe pas dekadash.”
Për realizimin e projektit po përdoren shërbime të kompanive si Microsoft Azure dhe Amazon Web Services, si dhe platforma qeveritare cloud. Të dhënat dhe aplikacionet po kopjohen në disa infrastrukturë të sigurta në Evropë për të shmangur rrezikun që një sulm i vetëm të paralizojë administratën shtetërore. Estonia po kërkon gjithashtu marrëveshje me vende partnere që të pranojnë të dhënat e saj shtetërore në rast emergjence; Britania dhe Norvegjia kanë njoftuar plane të ngjashme.
Përgatitjet lidhen me shqetësimet për sigurinë kombëtare dhe mundësinë e agresionit rus. Vendi baltik ka kaluar sulme kibernetike të mëdha në 2007, që paralizuan për 22 ditë disa shërbime. Në këtë situatë të tensionuar, Talini njoftoi mbylljen nga 1 dhjetori të tri pikave kufitare me Rusinë—Narva, Koidula dhe Luhamaa—pas një incidenti të dyshuar sabotimi ndaj kompanisë Threod Systems, për të cilin autoritetet thanë se GRU kishte urdhëruar dhe koordinuar tentativën. Moska e ka mohuar akuzën. Qeveria pritet të vendosë nëse mbyllja do të jetë e përkohshme apo pa afat.
