Kombëtarja Baske vazhdon të tërheqë vëmendje të madhe, pavarësisht se nuk njihet nga FIFA dhe UEFA. Ekipi i tyre mposhti Venezuelën me rezultat 1-0 në një ndeshje miqësore të zhvilluar të shtunën në stadiumin “San Mamés” në Bilbao, ku të pranishëm ishin plot 40.041 spektatorë.

Golin e vetëm të takimit e shënoi mesfushori i Athletic Bilbaos, Mikel Jauregizar, në minutën e 28-të.


Në fushë për Baskinë u paraqitën edhe emra të njohur të futbollit spanjoll, si Kepa Arrizabalaga, Oihan Sancet dhe Igor Zubeldia.

Sipas vlerësimit të përbërjes së saj, futbollistët e kësaj përfaqësueseje kanë një vlerë të përgjithshme prej rreth 134 milionë eurosh.

- YouTube www.youtube.com

Më shumë se një ndeshje miqësore

Ndeshja ishte pjesë e aktiviteteve për shënimin e 90-vjetorit të themelimit të qeverisë së parë baske, por kishte edhe një domethënie më të gjerë.

Për dekada me radhë, baskët kanë kërkuar që përfaqësuesja e tyre të fitojë të drejtën për të garuar në arenën ndërkombëtare, një synim që deri më tani nuk është realizuar.

E njohur si “Euskal Selekzioa”, Kombëtarja baske menaxhohet nga Federata Baske e Futbollit, por nuk është anëtare e FIFA-s dhe UEFA-s.

Për këtë arsye, ajo nuk mund të marrë pjesë në kualifikueset për Kampionatin Botëror apo Evropian dhe as në Ligën e Kombeve. Paraqitjet e saj kufizohen kryesisht në ndeshje miqësore.

Pse FIFA dhe UEFA nuk e njohin?

Pengesa kryesore lidhet me statusin politik dhe juridik të Vendit Bask, i cili është një komunitet autonom brenda Spanjës. Sipas rregullave të futbollit ndërkombëtar, anëtarësimi në FIFA dhe UEFA lidhet me kushte të veçanta për federatat dhe shtetet.

Baskët nuk kanë arritur deri më tani ta sigurojnë këtë status, ndonëse ekzistojnë përjashtime historike, si Anglia, Skocia, Uellsi dhe Irlanda e Veriut.

Megjithatë, përpjekjet për njohje nuk janë ndalur. Më 10 nëntor, Federata Baske e Futbollit nisi një procedurë të re, duke iu drejtuar Këshillit të Lartë Spanjoll për Sport dhe duke informuar Federatën Spanjolle të Futbollit.

Iniciativa mbështetet në një dispozitë të Ligjit Spanjoll të Sportit të vitit 2022, e cila mundëson pjesëmarrje ndërkombëtare të shoqatave rajonale në rrethana të caktuara. Megjithatë, vendimi përfundimtar për njohjen do të varej edhe nga rregullat e FIFA-s dhe UEFA-s.

Si mund të luajnë për Baskinë futbollistët e Spanjës?

Një tjetër veçanti e kësaj përfaqësueseje është se për të mund të luajnë edhe futbollistë që kanë përfaqësuar më parë Spanjën.

Kjo ndodh sepse ndeshjet e Baskisë nuk kanë statusin e ndeshjeve zyrtare ndërkombëtare të FIFA-s dhe, rrjedhimisht, nuk ndikojnë në të drejtën e lojtarëve për të përfaqësuar Spanjën.

Shembulli më i njohur në ndeshjen ndaj Venezuelës ishte portieri Kepa Arrizabalaga, i cili ka zhvilluar 13 paraqitje për Spanjën. Ai ishte pjesë e përfaqësueses baske, pa humbur të drejtën për t'u aktivizuar sërish me kombëtaren spanjolle.

Një histori që daton nga viti 1915

Futbolli bask ka një histori të gjatë, që daton që nga viti 1915, kur përfaqësuesja luajti ndeshjen e saj të parë kundër Katalonjës, duke fituar 6-1.

Një periudhë e veçantë ishte edhe viti 1937, gjatë Luftës Civile Spanjolle, kur skuadra “Euskadi” zhvilloi ndeshje në Evropë dhe Amerikë, duke synuar të sensibilizonte opinionin ndërkombëtar për situatën në Vendin Bask.

Vendi Bask përbëhet nga tri provinca historike në veri të Spanjës: Álava, Bizkaia dhe Gipuzkoa, ndërsa Bilbao, San Sebastiáni dhe Vitoria-Gasteiz janë ndër qytetet kryesore të tij. Rajoni ka identitet të veçantë kulturor dhe gjuhën e vet, baskishten.

Në futboll, tradita e tij përfaqësohet veçanërisht nga klube si Athletic Bilbao dhe Real Sociedad, të cilat kanë luajtur rol të rëndësishëm në zhvillimin e futbollistëve vendas. Athletic Bilbao, në veçanti, njihet për politikën e saj të angazhimit të lojtarëve me lidhje baskë.

Për baskët, kjo përfaqësuese është shumë më tepër sesa një ekip që zhvillon ndeshje miqësore. Ajo është simbol i identitetit të tyre kulturor dhe i përpjekjeve për përfaqësim ndërkombëtar, ndërsa interesimi i mbi 40 mijë tifozëve në "San Mamés” dëshmon se dëshira për ta parë ekipin në fushë mbetet e madhe. /Telegrafi/