Vizita në Kinë, Trump: Mund të takohem edhe me Kim Jong Un
Presidenti i SHBA-së, Donald Trump, deklaroi sot se mund të takohet me liderin e Koresë së Veriut, Kim Jong Un, gjatë udhëtimit të tij në Azi, në kuadër të të cilit pritet të marrë pjesë edhe në një samit me homologët e tij, presidentin rus Vladimir Putin dhe atë kinez Xi Jinping.
“Do të jemi me presidentin Xi (…) do të takohemi gjithashtu me presidentin Putin dhe, për më tepër, mund të takohemi edhe me Kim Jong Un”, deklaroi Trump në Shtëpinë e Bardhë, përpara se të nisej me avion drejt Manilës, ku do të marrë pjesë në samitin e ASEAN-it (Shoqata e Vendeve të Azisë Juglindore), i cili nis të martën.
“Prandaj, kjo do të ishte diçka e mirë”, shtoi ai, duke sqaruar se çdo takim i mundshëm me Kim Jong Un do të zhvillohej në Kinë.
Presidenti amerikan, i cili është takuar më parë me liderin e Koresë së Veriut gjatë mandatit të tij të parë, në periudhën 2017-2021, përfshirë edhe në Zonën e Çmilitarizuar të Koresë, ka shprehur interesin e tij për një tjetër takim gjatë mandatit aktual.
Megjithatë, zyrtarë të lartë amerikanë kishin deklaruar më herët se një takim i tillë nuk ishte pjesë e planeve të tij të menjëhershme.




