Promovimi i hapjes dhe bashkëpunimit dhe arritja e begatisë të përbashkët nuk përbëjnë vetëm qëllimet kyçe të APEC-ut, por edhe janë thelbësore për trajtimin e sfidave të zhvillimit me të cilat përballet rajoni i Azi-Paqësorit – u konkludua pas një sondazhi të CGTN -së, zhvilluar në prag të takimit të 33 të liderve të APEC-ut.
Përgjatë viteve, APEC-u ka punuar vazhdimisht për të nxitur liberalizimin dhe lehtësimin e tregtisë e të investimeve, duke ofruar një platformë të rëndësishme për ekonomitë anëtare për të thelluar lidhjet ekonomike e tregtare.
Roli i tij në promovimin e zhvillimit ekonomik rajonal dhe forcimin e bashkëpunimit midis anëtarëve është i njohur gjerësisht.
67.1 % e pjesëmarrësve në sondazh besojnë që APEC-u luan një rol pozitiv në mbështetjen e një ekonomie botërore të hapur, bashkëpunimit tregtar dhe globalizimit ekonomik, kurse 71.1 % mendojnë se ekonomitë e Azi-Paqësorit duhet të përpiqen për hapje, përfshirje, risi, lidhshmëri dhe përfitime të ndërsjella, çka renditet e para ndër gjashtë deklaratat lidhur me bashkëpunimin e Azi-Paqësorit.
Ndërkohë, 65.5 % thanë se ekonomitë anëtare të APEC-ut duhet të kundërshtojnë proteksionizmin dhe të mbështesin bashkëpunimin shumëpalësh e tregtinë e lirë. Përkrahja për këtë qëndrim e kaloi 70 % në të gjashtë vendet e Azisë Juglindore të përfshira në sondazh.
Ky vit shënon herën e tretë që Kina pret APEC-un. Duke u shndërruar nga një pjesëmarrëse aktive në një nxitëse kyçe të bashkëpunimit rajonal, Kina e ka lidhur vazhdimisht zhvillimin e saj me përparimin e përbashkët të Azi-Paqësorit, duke vënë në praktikë parimet e hapjes, përfshirjes dhe përfitimeve të ndërsjella.
Kina e ka shfrytëzuar në mënyrë aktive platformën e APEC-ut për të thelluar bashkëpunimin praktik rajonal, duke mbështetur sistemin shumëpalësh të tregtisë, duke promovuar liberalizimin dhe lehtësimin e tregtisë dhe të investimeve, duke siguruar funksionimin e lirshëm të zinxhirëve industrialë e të furnizimit dhe duke zgjeruar bashkëpunimin në ekonomitë digjitale dhe të gjelbra.
Sondazhi përfshiu si ekonomitë kryesore të zhvilluara, ashtu edhe vendet e Jugut Global. Të gjithë të anketuarit ishin pjesëtarë të publikut të përgjithshëm të moshës 18 vjeç e lart, me mostrat që përputheshin me përndarjen e moshës dhe gjinisë të raportuara në të dhënat e regjistrimit të secilit vend.
Rezultatet janë përfshirë në Raportin e Sondazhit të Opinionit Publik Global mbi një Bashkësi me të Ardhme të Përbashkët të Azi-Paqësorit dhe janë publikuar për publikun global.










