Tri organizata serbe nga Kosova kanë dorëzuar një kallëzim penal në Prokurorinë e Lartë Publike në Beograd kundër presidentit të Serbisë, Aleksandër Vuçiç, dhe katër zyrtarëve të tjerë të lartë, duke i akuzuar për tejkalim të kompetencave, shpërdorim të detyrës dhe moskryerje të detyrimeve zyrtare.
Kallëzimi është paraqitur këtë të hënë nga Këshilli Kombëtar Serb i Kosovës, Forumi Kombëtar Serb nga Graçanica dhe organizata “Otadžbina”.
Përveç Vuçiçit, në listën e personave të kallëzuar janë edhe ministri i Brendshëm Ivica Daçiç, kryetarja e Kuvendit serb Ana Bërnabiç, drejtori i Zyrës për Kosovën në qeverinë serbe, Petar Petkoviç, si dhe ish-kryetari i Listës Serbe, Goran Rakiç.
Në qendër të kallëzimit janë politikat e ndjekura nga Beogradi ndaj Kosovës dhe, veçanërisht, mbyllja e institucioneve serbe që kanë funksionuar në territorin e saj. Sipas tri organizatave, gjatë viteve të fundit janë mbyllur një numër i madh institucionesh që vepronin sipas sistemit të Serbisë, ndërsa përgjegjësinë për këtë zhvillim ia atribuojnë drejtuesve politikë në Beograd.
Ata kundërshtojnë gjithashtu marrëveshjet e arritura mes Kosovës dhe Serbisë, përfshirë Marrëveshjen e Brukselit dhe atë të Ohrit. Sipas pretendimeve të tyre, këto marrëveshje dhe vendimet e marra nga autoritetet serbe kanë dobësuar praninë e Serbisë në Kosovë dhe kanë ndihmuar në forcimin e institucioneve të Prishtinës.
Nisma për kallëzimin penal ishte paralajmëruar më 27 tetor, fillimisht kundër Vuçiçit dhe Daçiçit, pas fitores së Listës Studentore në zgjedhjet parlamentare në Serbi. Më pas, në listën e personave të kallëzuar u përfshinë edhe tre zyrtarët e tjerë.
Organizatat i kërkojnë prokurorisë të shqyrtojë përgjegjësinë e pesë zyrtarëve për veprimet dhe vendimet e tyre.













