PET Scan, investimi prej 250 milionë lekësh të reja i qeverisë për shëndetësinë, është paguar pjesërisht tashmë, por ende nuk është instaluar. Ministrja e Shëndetësisë Klodiana Spahiu, thotë për “Studio Live” në Report Tv se nevojitet një kohë e caktuar për krijimin e kushteve të aparaturës.
“PET Scan-i ka qenë një nga investimet e qeverisë shqiptare për vitin 2026. Pra, është paguar pjesa kryesore e aparaturës, por duhet të kuptojmë që kjo është një aparaturë e cila nuk është se blihet, por porositet. Nuk është se ti e ke gati dhe e blen, por ajo porositet. Agjencia Atomike po na ndihmon dhe kjo blerje do të bëhet prej tyre.
Si çdo aparaturë e veçantë, edhe kjo kërkon rregulla shumë strikte. Grupi i punës po punon paralelisht për krijimin e kushteve për vendosjen e aparaturës në Qendrën Spitalore Universitare, në vendin ku ofrohet shërbimi i mjekësisë nukleare.
Kjo kërkon një kohë të caktuar për t'u planifikuar vendi, për t'u hartuar nga Instituti i Ndërtimit, për t'u miratuar projekti dhe për t'u prokuruar. Ju e dini që vetëm procesi i prokurimit zgjat minimalisht 45 ditë, në qoftë se nuk ka ankim”, tha Spahiu.
Lajm në përditësim…

Ministrja Klodiana Spahiu pranon haptazi se në spitale ka mungesë të barnave dhe pajisjeve, ndërsa sheh si zgjidhje konkrete financimin e tyre të plotë nga shteti.
Në “Studio Live” në Report Tv, ajo thotë se është përgjegjësi e shtetit për të garantuar që mos të ketë mungesa. Qeveria do të garantojë lidhjen dhe blerjen e barnave dhe produkteve mjekësore drejt e nga kompania mëmë.
“E gjithë problematika që ju keni evidentuar dhe që unë po e provoj tani në këta pak muaj si ministre e Shëndetësisë, të gjitha mungesat në barna, ku sot, për shembull, kolegët tuaj dalin dhe thonë mungon ky bar, mungon kjo pajisje mjekësore, na mungon kjo pajisja tjetër, na mungon ky furnizim, po, janë të vërteta. Dhe e vetmja zgjidhje, të jeni të sigurt, e vetmja zgjidhje do të jetë vetëm atëherë kur garancinë për ta furnizuar sektorin publik, jo sektorin privat, sektorin publik, e merr shteti. Në momentin që mua sot më mungon një medikament me të cilin unë kam lidhur kontratë, e kam kontratën efektive dhe më mungon medikamenti X në onkologji, ose më mungojnë sot shumë nga pajisjet që ju i keni përmendur, do të jetë përgjegjësi e shtetit dhe e kësaj shoqërie për t'u dalë garant që në sistemin shëndetësor publik të mos ketë asnjë mungesë.
Kjo shoqëri, e cila patjetër fillimisht do të ketë një buxhet të caktuar, të cilin do t'ia japë shteti, do të mundohet patjetër që të ardhurat që do të krijojë shoqëria t'i riinvestojë përsëri vetëm te shoqëria, për të mundur që jo vetëm të forcohet vetë. Ky model që ne po ju paraqesim nuk është një model që e shpikëm ne apo e shpiku grupi i punës ku jam unë. Nuk është një model vetëm shqiptar. E kanë vende shumë të përparuara, siç mund të jetë Danimarka, Portugalia, e ka pjesërisht Greqia, por edhe plot vende të tjera, të cilat e kanë sistemin shëndetësor dhe ofrimin e shërbimit ndaj qytetarëve shumë më të mirë se ne.
Kemi shumë raporte të Kontrollit të Lartë të Shtetit, të cilat besoj që na kanë shërbyer gjithmonë si udhërrëfyese në rekomandime dhe në sugjerime për të reflektuar ndaj mungesave që mund të ketë sistemi shëndetësor. Kemi shumë sugjerime që na janë bërë nga ju, nga kolegët tuaj, të cilat fokusohen kryesisht te mungesat që kemi në sistemin shëndetësor
Unë dua sot që medikamenti të jetë në QSUT. Dua dhe që pajisja të jetë në QSUT. Por, siç jua përmenda, që të jetë medikamenti ka një lidhje kontrate me një kompani që e sjell dhe kompania thotë: Unë nuk ta sjell dot, sepse nuk furnizohem dot nga kompania mëmë që e prodhon. Unë po ju them se, nëpërmjet kësaj shoqërie, do të jetë shteti garant i lidhjes dhe i blerjes së këtij medikamenti direkt te kompania mëmë dhe nuk do të ketë më mungesa në tregun e shëndetësisë shqiptare në lidhje me furnizimin me medikamente dhe me produkte mjekësore”, tha Spahiu.
Autonomia financiare e QSUT do të përkthehet në përgatitje më të lartë dhe ofrimin e shërbimeve të munguara, thotë ministrja Klodiana Spahiu. Synimi, të cilin ajo e shpreh në “Studio Live” në Report Tv, është kthimi i QSUT në qendër rajonale.
Më tej, premton se do të përpiqet që çdo vendimmarrje e Ministrisë së Shëndetësisë të ketë ndikim real te qytetarët.
“Qendra Spitalore Universitare ka marrë autonominë financiare dhe ne po përpiqemi që jo vetëm nëpërmjet autonomisë financiare, por edhe çdo ndryshim që duhet bërë në bazën ligjore, ne duhet të jemi të përgatitur në kohë rekord për të realizuar që asnjë shërbim që u kërkohet sot qytetarëve ta kenë në Qendrën Spitalore Universitare, si qendër terciare, dhe që ne synojmë ta kthejmë në një qendër rajonale, të mos i mungojë.
Për këtë arsye ne kemi vendosur që në Qendrën Spitalore Universitare të kemi një shërbim të ri, që është shërbimi i geriatrise për moshën e tretë, dhe këtë shërbim të geriatrisë, në kushte modeste, të kemi mundësi ta ofrojmë edhe në katër nga spitalet bashkiake. Pse e bëmë këtë gjë? Sepse pamë që shfrytëzimi i shtratit në këto spitale bashkiake është i ulët.
Por nuk është vetëm PET Scan-i. Ne kemi sfidë edhe aparatura të tjera që duhet të hyjnë në QSUT. Është brakiterapia shumë e munguar, për të cilën po punohet shumë fort. Vetëm që duhet të më mirëkuptoni që ne e kemi filluar punën. Unë e gjeta të filluar punën njëherë, se nuk është se e shpika unë punën. Ajo ishte aty.
Jemi të vendosur që çdo shërbim të munguar, sot, Qendra Spitalore Universitare ta ketë. Do të jem e vëmendshme për çdo vendimmarrje timen dhe do të jem e kujdesshme që çdo vendimmarrje të ketë impakt te çdo qytetar shqiptar”, tha Spahiu.










Komente
Komento