Një 43-vjeçar shqiptar ndodhet në gjendje kritike në spitalin San Matteo në Pavia të Italisë, pasi u qëllua me armë zjarri në një atentat në Certosa di Pavia. Plumbi i depërtoi në trup dhe i dëmtoi njërën mushkëri, ndërsa mjekët e kanë shtruar në repartin e terapisë intensive, me prognozë të rezervuar dhe në rrezik për jetën.
Ngjarja ndodhi rreth orës 19:30 të së shtunës, pak pasi shqiptari dhe një mik e koleg i tij kishin dalë nga një lokal. Të dy po ktheheshin në shtëpi, ku familjet i prisnin për darkë. Miku kishte parkuar automjetin në zonën e Conca del Naviglio dhe kishte vendosur ta shoqëronte 43-vjeçarin deri në banesë.
Teksa po ecnin drejt parkingut, pranë tyre kaloi një automjet që uli shpejtësinë, por nuk u ndal dhe as nuk hyri në hapësirën e parkimit. Nga dritarja e përparme në anën e pasagjerit, një person hapi zjarr me pistoletë.
Plumbi i kalibrit 7.65 mm e goditi 43-vjeçarin në anën e trupit, pranë ijëve. I plagosuri u dërgua në urgjencën e spitalit San Matteo në Pavia nga familjarët e tij, ku mbërriti në gjendje shumë të rëndë për shkak të dëmtimit të mushkërisë.
Sipas të dhënave të publikuara për ngjarjen, as 43-vjeçari dhe as miku që e shoqëronte nuk rezultojnë të kenë precedentë penalë.
Ndërkohë, Sektori i Hetimit i Policisë së Pavia-s ka nisur punën për identifikimin e autorëve. Hetuesit po shqyrtojnë pamjet e kamerave të sigurisë për të gjurmuar automjetin nga i cili u qëllua.
Dyshohet se në makinë ndodheshin dy persona: drejtuesi i automjetit dhe autori i të shtënave. Pas sulmit, automjeti dyshohet se ka vijuar lëvizjen dhe në semaforin pranë rrugës shtetërore ka marrë kthesën djathtas, në drejtim të Milanos.

