Blendi Klosi, i ftuar në emisionin Top Story, foli për mbledhjen e Asamblesë së Partisë Socialiste të mbajtur të shtunën, duke u ndalur kryesisht te largimi i Elisa Spiropalit nga forumet e PS-së. Ai theksoi se Spiropali nuk është shkarkuar nga partia, por është përjashtuar nga të gjitha forumet e partisë. Kur Grida Duma e pyeti nëse kishte votuar për këtë vendim, Klosi nuk iu përgjigj drejtpërdrejt.
Sipas tij, vendimi u mor nga forumet pas kërkesës së Asamblesë. Klosi përshkroi mbledhjen si një takim rutinë për fushatën dhe organizimin e partisë, ku një pjesë e diskutimeve u zhvillua me dyer të mbyllura. Pas përfundimit të mbledhjes, sipas tij, anëtarët u shpërndanë dhe nisën punën për fushatën, me qëllim që të përcaktohej fokusi i veprimit politik “që të mos prodhojmë lajm në 6 muajt që vijnë”. Ai tha se në këtë kuadër u mor vendimi për t’i përjashtuar nga forumet edhe Plarent Ndrecën.
Klosi sqaroi se PS nuk është parti që praktikon shkarkime të tërthorta dhe se kjo është pjesë e filozofisë së saj për dekada, me një ambient të hapur. Ai përmendi se statutet e partisë parashikojnë edhe regjistrimin online dhe se mënyra si formohet dhe si shkarkohet brenda Asamblesë është e rregulluar në statut. Duke iu referuar nenit 22, Klosi tha se forumeve u jepet e drejta që, për arsye që Asambleja i gjykon vetë, të kërkojnë shkarkimin e anëtarëve.
Ai theksoi se ishin tre kolegë që patën diskutime dhe se vendimi u mor nga e gjithë Asambleja. Qëndrimi i Asamblesë ishte që të dy anëtarët të shkarkoheshin nga forumet, por jo nga vetë Partia Socialiste; “nga partia nuk kemi shkarkuar askënd”, tha Klosi. Kur u pyet për “vijën e kuqe” që çoi te përjashtimi i Spiropalit, ai e përshkroi çështjen si një problem të brendshëm organizativ dhe nënvizoi se publiku duhet të dijë ku fokusohet PS-ja, duke e cilësuar diskutimin si thjesht e të qartë dhe pjesë të organizimit të brendshëm.
