Lufta mes Rusisë dhe Ukrainës është shoqëruar me një valë të re sulmesh reciproke, ku në shënjestër kanë qenë infrastruktura strategjike dhe objektet me rëndësi ushtarake. Dy ura të mëdha në kryeqytetin ukrainas, Kiev, janë goditur nga raketat balistike ruse, ndërsa Ukraina ka sulmuar për të dytën ditë radhazi urën e Kerçit, që lidh Rusinë me gadishullin e pushtuar të Krimesë.
Kryebashkiaku i Kievit, Vitali Klitschko, deklaroi se raketat ruse goditën urat Veriore dhe Jugore mbi lumin Dnjepër, duke shkaktuar dëme në infrastrukturën kritike të qytetit. Si pasojë e sulmeve, disa zona kanë përjetuar ndërprerje të furnizimit me ujë, energji elektrike dhe ngrohje.
Shpërthime të fuqishme u dëgjuan në kryeqytet pak para mesnatës së së martës. Autoritetet njoftuan gjithashtu për dëmtime në disa linja të metrosë mbi tokë, ndërsa banorët ishin udhëzuar të strehoheshin në ambientet nëntokësore për t’i shpëtuar bombardimeve.
Tetë ura të mëdha përshkojnë lumin Dnjepër dhe lidhin pjesën perëndimore me atë lindore të Kievit. Rreth tre milionë banorë varen nga këto ura për lëvizjen e përditshme në qytet. Disa prej tyre ishin shënjestruar edhe gjatë sulmeve me dronë rusë në muajin tetor.
Ndërkohë, Ukraina ka goditur urën e Kerçit, një prej simboleve më të rëndësishme të kontrollit rus mbi Krimenë. Guvernatori i rajonit i emëruar nga Moska, Sergei Aksyonov, deklaroi se sulmi shkaktoi vdekjen e dy personave dhe se qarkullimi mbi urë u pezullua.
Ura, e ndërtuar nga Rusia pas aneksimit të Krimesë në vitin 2014, u inaugurua nga presidenti Vladimir Putin në vitin 2018. Ajo ka qenë vazhdimisht në shënjestër të forcave ukrainase, për shkak të rëndësisë së saj për lidhjen logjistike mes Rusisë dhe gadishullit të pushtuar. Megjithatë, shkalla e dëmeve nga sulmi i fundit nuk është bërë ende e qartë.
Përshkallëzimi i sulmeve vjen në një moment kur përfaqësues amerikanë, ukrainas dhe europianë po zhvillojnë bisedime të reja për t’i dhënë fund luftës. Presidenti ukrainas Volodymyr Zelensky kishte paralajmëruar më herët se Moska mund të ndërmerrte sulme të tjera gjatë natës së së hënës.
Bisedimet online u zhvilluan me pjesëmarrjen e të dërguarit amerikan Jared Kushner dhe të dërguarit të posaçëm Steve Witkoff, pas pretendimeve të Rusisë se kishte përballuar sulmin më të madh me dronë ukrainas që nga fillimi i luftës.
Kryebashkiaku i Moskës, Sergei Sobyanin, deklaroi se rreth 600 dronë kishin fluturuar drejt kryeqytetit rus, ndërsa autoritetet ushtarake ruse pretenduan se brenda 24 orëve kishin interceptuar dhe shkatërruar 2,049 dronë dhe katër raketa me rreze të gjatë veprimi të tipit Flamingo.
Pas takimit, Jared Kushner deklaroi se Shtetet e Bashkuara mbeten të angazhuara për t’i ofruar Ukrainës garanci të forta dhe të besueshme sigurie, si dhe një rrugë drejt anëtarësimit në Bashkimin Europian. Ai theksoi gjithashtu se NATO do të vijojë të jetë një shtyllë thelbësore e sigurisë europiane.
Nga ana e tij, Zelensky e cilësoi takimin të vështirë dhe kërkoi më shumë mbështetje për mbrojtjen e Ukrainës nga sulmet me raketa balistike. Ai bëri të ditur se për herë të parë në diskutime ishte përfaqësuar një delegacion i plotë europian, ku përfshiheshin Mbretëria e Bashkuar, Franca, Gjermania, Italia, Polonia, Bashkimi Europian dhe NATO.
Presidenti ukrainas përsëriti gjithashtu akuzat se Rusia po merr dhjetëra raketa në muaj nga Koreja e Veriut.
Ndërkohë, autoritetet ukrainase kanë konfirmuar se bilanci përfundimtar i viktimave nga bombardimi rus në fshatin Kamyshuvakha, në jug të vendit, ka arritur në 72 të vdekur. Katër persona rezultojnë ende të zhdukur.
Sulmi i 2 nëntorit konsiderohet nga Kievi si një prej episodeve më vdekjeprurëse të luftës që prej vitit 2022. Pamjet e regjistruara nga kamera e një efektivi policie që humbi jetën tregojnë banorët duke u drejtuar drejt një strehe nëntokësore pas bombardimit të parë. Pak çaste më vonë dëgjohet një shpërthim tjetër dhe shihen flakët që përfshijnë strehën.
Mes viktimave kishte efektivë policie, punonjës të një gjimnazi, punonjës të shërbimeve publike dhe personel mjekësor.
Rusia nisi pushtimin në shkallë të plotë të Ukrainës në shkurt të vitit 2022. Aktualisht, rreth një e pesta e territorit ukrainas ndodhet nën pushtimin rus, ndërsa Kievi vijon të kundërshtojë kërkesën e Vladimir Putinit për të dorëzuar edhe territoret e Donbasit lindor që vazhdojnë të jenë nën kontrollin ukrainas.
© SYRI.net