Tuesday / November 17 / 2026
Revista Monitor Logo
hamburger menu icon

mbyll

close icon
Ads
Bota Europa

Itali, Revolut nën administrim gjyqësor, shkak mangësitë në luftën kundër pastrimit të parave

Share Share Icon

Masa ndaj bankës dixhitale u kërkua nga Prokuroria e Milanos, në kuadër të një hetimi të Guardia di Finanza. Sipas hetuesve, mangësitë në sistemet e kontrollit lehtësuan fshehjen dhe transferimin e 76.5 milionë eurove.

Dega italiane e Revolut do të vendoset nën administrim gjyqësor për një vit.

Vendimi u mor nga Gjykata e Milanos, me kërkesë të prokurorit Paolo Storari, pas hetimeve që zbuluan dobësi serioze në sistemin e bankës dixhitale për parandalimin e pastrimit të parave. Mes tyre përfshihen edhe “marrëdhëniet ndërmjet institucionit të kreditit dhe personave nën hetim ose të dënuar për vepra penale të pastrimit të parave dhe transferimit mashtrues të pasurive, përfshirë rastet e rënduara nga përdorimi i metodave mafioze ose lehtësimi i veprimtarisë mafioze”, shkroi kryeprokurori i Milanos, Marcello Viola.

Sipas prokurorisë, duke u mundësuar akses në sistemin financiar personave që, në shumë raste, ishin gjithashtu “subjekt i masave parandaluese personale ose pasurore”, banka do të kishte lehtësuar “kryerjen e transaksioneve për transferimin, fshehjen ose devijimin e kapitaleve”, me një vlerë totale prej 76.5 milionë eurosh.

Një zëdhënës i bankës dixhitale me seli në Mbretërinë e Bashkuar deklaroi se Revolut do të bashkëpunojë me autoritetet. Brenda 60 ditëve, banka duhet të hartojë një plan veprimi për të adresuar problemet e identifikuara. Seanca e ardhshme gjyqësore është caktuar për më 25 shkurt 2027.

Kontrollet që çuan në vendosjen e Revolut nën administrim gjyqësor

Nevoja për një “program korrigjues” përmes administrimit gjyqësor buron edhe nga fakti se problemet e Revolut shtrihen në “një periudhë kohore nga viti 2021 deri në vitin 2026” dhe “përfshijnë sektorë, klientë dhe skema të ndryshme”.

Sipas prokurorisë, moskryerja e kontrolleve të detyrueshme kundër pastrimit të parave ishte shndërruar në një “model të qëndrueshëm administrimi”, që kishte mundësuar fshehjen e flukseve financiare me vlerë pothuajse 42 milionë euro, nga viti 2021 deri këtë vit.

Anomalitë financiare përshkruhen si të një “natyre të përsëritur dhe të kombinuar”, me “pagesa hyrëse në shuma të konsiderueshme, ndarje dhe transferim të menjëhershëm të fondeve, përdorim të parave fizike, këmbim valutor, dërgim fondesh në llogari të huaja ose në kriptoaktive”.

Këto veprime kishin aktivizuar sinjalizime në disa institucione të tjera financiare, por jo në Revolut.

Sipas agjencisë Ansa, hetimet e Drejtorisë së Qarkut Antimafia (DDA) pasuan dy kontrolle të veçanta të njësisë së policisë ekonomike të Guardia di Finanza.

Kontrolli i parë lidhet me një inspektim të vitit 2024 për parandalimin e pastrimit të parave te një ofrues shërbimesh të aktiveve virtuale të Revolut. Gjatë inspektimit u zbuluan parregullsi të shumta në identifikimin dhe verifikimin e klientëve – u pretenduan më shumë se një milion shkelje – si dhe në zbatimin e procedurave të kontrollit dhe në mosraportimin e transaksioneve të dyshimta.

Mes klientëve përfshihen persona të hetuar në çështjet “Hydra” dhe “Equalize”

Hetimi i dytë lidhet me procedimet për mashtrim tatimor në Milano gjatë vitit 2025, ku dyshohet se janë përdorur llogari të Revolut për të kryer transaksione të lidhura me vepra penale tatimore dhe pastrim parash. Në këtë çështje janë nën hetim 24 persona.

Për këta individë, të marrë si një “kampion” për analizë, disa institucione të tjera financiare kishin paraqitur qindra raportime për transaksione të dyshimta.

Përmes një urdhri për paraqitjen e dokumentacionit, prokuroria i kërkoi Revolut dokumente, por mori vetëm përgjigje të pjesshme.

Sipas Ansa, mes klientëve italianë të bankës figuron Maurizio Ponzoni, i cili, sipas një hetimi tjetër, dyshohet se ka pasur “marrëdhënie biznesi” me Vincenzo Rispoli, një drejtues të mafies kalabreze në Lombardi.

Në dosje përfshihet edhe emri i Saverio Pintaudi, i përfshirë në çështjen “Hydra”, si dhe ai i Nunzio Samuele Calamucci, një ekspert i teknologjisë së informacionit, i arrestuar në vitin 2024 në kuadër të çështjes “Equalize”, për akses të dyshuar të paautorizuar në baza të dhënash strategjike.

Hetimet mundësuan rindërtimin e flukseve financiare në “një rrjet kompanish italiane dhe të huaja”, që dyshohet se kanë lidhje me “klanin Greco”, i njohur për trafikimin e armëve dhe drogës.

Në dokumente shfaqet edhe emri i Pasquale Puglia, i lidhur me klanin Molluso dhe i dënuar për pjesëmarrje në organizatë mafioze. Në rastin e tij dyshohet se janë devijuar edhe shuma parash që ishin “objekt sekuestrimi”.

Megjithatë, sipas dokumenteve, nuk ka prova që e lidhin drejtpërdrejt Revolut “me personat që kanë përfituar”, apo që organet drejtuese të bankës “të kenë pranuar me vetëdije skemat individuale kriminale”.

Çfarë do të ndodhë me Revolut

Mandati i administratorëve gjyqësorë kufizohet vetëm në fushat ku janë identifikuar probleme dhe, sipas vendimit të seksionit të masave parandaluese të Gjykatës së Milanos, nuk do të ketë ndërhyrje të përgjithshme që prek të gjitha aktivitetet e bankës.

Përkrah drejtuesve të bankës, si administratorë të emëruar nga gjykata, do të punojnë avokatja Ilaria Ramoni dhe konsulenti profesionist Piero Antonio Capitini.

Sipas vendimit, administrimi gjyqësor nuk nënkupton një ndërhyrje të përgjithshme në të gjitha aktivitetet e institucionit. Mandati i administratorëve kufizohet në fushat ku janë konstatuar probleme.

Detyra do të kryhet nga avokatja Ilaria Ramoni dhe konsulenti profesionist Piero Antonio Capitini, të cilët janë ngarkuar të bashkëpunojnë me drejtuesit e bankës për të rindërtuar mënyrën se si janë shpërndarë përgjegjësitë e brendshme për parandalimin e pastrimit të parave.

Do të kontrollohen gjithashtu mjetet informatike që përdoren për monitorimin e lëvizjeve financiare, për të përcaktuar se çfarë informacioni mblidhet, si vendosen pragjet që aktivizojnë sinjalizimet dhe nëse anomalitë e identifikuara i nënshtrohen realisht hetimeve të mëtejshme.

Do të shqyrtohen edhe procedurat për hapjen e llogarive online dhe lidhjen e kartave të pagesës me mbajtësit përkatës, duke i kushtuar vëmendje të veçantë identifikimit dhe autentifikimit të përdoruesve, parandalimit të mashtrimit me identitetin dhe trajtimit të ankesave nga persona që pretendojnë se nuk kanë kërkuar lëshimin e një karte apo hapjen e një llogarie. / Euronews

Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.

Leave a Reply

Your email address will not be published. Required fields are marked *

Ekskluzive Monitor Top 1,000

Publikohen për herë të parë treguesit financiarë të 1000 kompanive më të mëdha në vend. Renditja e grupeve kryesore!

Eksploro Top List
Live Now

Lajme të Ngjashme

Ta ruajmë taksën e sheshtë për të vetëpunësuarit në Itali

Nga Diego Tagliabue* Paketa buxhetore për vitin 2027 po merr formë. Giorgia Meloni njoftoi personalisht në rrjetet sociale një masë me rëndësi që s...

19 hours më parë 9 Min Lexim

FMN paralajmëron për rreziqe globale, financimi qarkullues në IA arrin 1 trilion dollarë

Ekonomia globale po mbështetet te inteligjenca artificiale (IA), deklaroi Drejtoresha Menaxhuese e Fondit Monetar Ndërkombëtar (FMN), Kristalina Ge...

22 hours më parë 4 Min Lexim
Ads
collaps icon

Rrisni limitin e artikujve në 400 në muaj FALAS! Regjistrohu Falas!

Rrisni limitin e artikujve në 400 në muaj FALAS!

Si përdorues i paregjistruar, mund të lexoni vetëm 200 artikuj në muaj. Mund ta rrisni këtë limit duke krijuar një llogari FALAS në faqen tonë.

Regjistrohu FALAS!