Reforma zgjedhore/ Gjiknuri ironizon propozimet e PD-së: Ngjan si manifest. Bylykbashi kërkon rikthimin e koalicioneve: Prodhojnë rotacion

17/11/2026 13:32

Komisioni i Posaçëm Parlamentar për Reformën Zgjedhore është mbledhur këtë të martë, ku në fokus të diskutimeve janë draftet ligjore të propozuara nga opozita, rekomandimet e pazbatuara të ODIHR-it, financimi i partive politike dhe ndryshimet që konsiderohen të nevojshme për zgjedhjet e ardhshme vendore.

Gjatë diskutimeve janë shfaqur qëndrime të ndryshme mes përfaqësuesve të mazhorancës dhe opozitës, veçanërisht për mënyrën se si duhet të procedohet me propozimet dhe për domosdoshmërinë e konsensusit politik.

Gjiknuri deklaroi se opozita duhet të paraqesë propozimet e saj në formën e akteve ligjore, në mënyrë që ekspertët të mund t’i shqyrtojnë dhe të nisin punën konkrete. Ai ngriti shqetësimin për vonesat në procesin e reformës, duke theksuar se kanë mbetur më pak se dy javë deri në përfundimin e afatit të nëntorit.

“Kam pritur nga opozita sjelljen e një projekti që sipas atyre ka nevojë për ndryshime, me erdhi një dokument, më ngjante si paper, nuk mu duk i plotë. Megjithatë, janë ndërmarrë procedurat e nevojshme. Propozimi i PD duhej të vinte me akt ligjor, ne do t’i hapim rrugë ekspertëve pasi opozita të sjellë propozimet e saj, që ata mendojnë se mund të ndryshojnë. Nuk mund ta paragjykojmë, dokumenti që patën sjellë ngjante si manifest, si republikë e re. Por nuk dua ta paragjykoj, pres propozimet konkrete. Dittë e fundit kemi pasur kontakte me trupën diplomatik, i kemi sqaruar se jemi vonë dhe po punojmë për rekomandimet e OSBE. Qëllimi juaj është i qartë, në fillim isha shumë besimplotë, por fatkeqësisht kemi humbur shumë afate dhe kemi një projekt fati të përfunduar të ligjit për partitë politike, por ky proces është bllokuar. Dhe ai ligj nuk qe thjesht dëshira jonë, ramë dakord që ta diskutonim, edhe pse nuk kërkon shumicë të theksuar. Shpresoj që në ditët e mbetura të jepet një vështrim nga ekspertët dhe ta çojmë për opinion të dytë në Komisionin e Venecias, që po e pret. Shpresoj të kemi mirëkuptimin e opozitës. Kanë mbetur më pak se dy javë për skadimin, nëse do të biem dakord, mund të bëjmë shumë gjëra. Në të kundërt jemi në situatë shqetësuese dhe Komisioni nuk do ta plotësojë punën e vet. Ne nuk do të rrimë duarkryq, do të sigurojmë kushtet për zgjedhje të lira dhe të ndershme”, tha Gjiknuri.

Nga ana tjetër, bashkëkryetari i komisionit nga opozita, Oerd Bylykbashi, kërkoi që reforma të mbështetet në konsensus politik dhe të përfshijë rregulla të qarta për ndalimin e abuzimeve gjatë proceseve zgjedhore. Ai kritikoi mazhorancën për mosrespektimin e marrëveshjes së 5 qershorit 2020 dhe kundërshtoi idenë se konsensusi mund të konsiderohet pengesë për përparimin e reformës.

“Të paktën sot u zbatua konsensusi për rendin e ditës. Ajo e radhës që shkoi ishte provokim i hapur dhe thyerje e rregullave dhe për shkak të kësaj u përdor për herë të dytë vetoja në histori vetoja. Uroj të mos ndodhë edhe sot, ka çështje që nuk duhet të kalojnë për diskutim. Ndarja e shtetit nga partia është një nga parimet kryesore të bashkëpunimit të shtetit dhe kjo Gjiknurit nuk i duket e rëndësishme. Kur e gllabëron shtetin nuk e sheh më këtë, por këtë e kanë thënë europianët. Partia në pushtet përfiton nga avantazhet dhe nuk ka zgjedhje të lira. Dhe raporti i OSBE kërkon konsensus. Nuk e di përse konsensusin e përkufizoni si element bllokimi. Konsensusin e 2020-ës e shkeli PS për të miratuar këtë paçavure që kemi sot. Kjo është një nga çështjet kryesore dhe nëse do të ketë konsensus kjo reformë do të jetë një nga gjërat më të mëdha që ka ndodhur. Nuk kemi për të pranuar më zgjidhje që nuk i refuzonim dot sepse ishim jashtë parlamentit. Pa një kornizë të qartë, ku përcaktohen ndalimet, nuk shkojmë përpara. Ku duhet të frenohet, sanksionet për shkeljet me gjoba të rënda. Sanksione penale të shkruara qarë”, deklaroi Bylykbashi.

Bylykbashi theksoi se opozita nuk kërkon më zgjidhje të pjesshme, por një paketë të plotë ligjore, me rregulla të detajuara dhe mekanizma konkretë zbatimi. Gjatë prezantimit të qëndrimeve të opozitës, Bylykbashi evidentoi disa prej ndryshimeve kryesore që Partia Demokratike kërkon të përfshihen në Reformën Zgjedhore.

“Në parim të paketës sonë, do të prek disa çështje të rëndësishme që duhet ti trajtojë Reforma Zgjedhore për sa na përket si ne si opozitë. Çështja e parë, ne kemi kërkuar që të rikthehet koalicioni me listë të përbërë, ne kërkojmë respektimin e marrëveshjes së 5 qershorit që e mbështeti Departamenti i Shtetit dhe Komisioni Europian në atë kohë. Unë dhe Gjiknuri kemi firmat tona, e shkeli Edi Rama. Kjo ka provuar që prodhon rotacion. Koalicioni që i jep cdo partie mundësinë të garojë me emrin e vet, siglen e vet, të marrë votën e vet. Ka funksionuar në 2003, 2005, 2009 e me radhë, deri në 2013, prodhoi rotacion.  Së dyti, sistem proporcional kombëtar me listë 100 për qind të hapur për zgjedhjet parlamentare. Kemi kërkuar hapjen 100 për qind të listës për këshilltarët bashkiakë”, tha ai.

Top Channel