Presidenti i Amerikës, Donald Trump ka shprehur bindjen se lufta mes Rusisë dhe Ukrainës mund të jetë drejt përfundimit. Trump ka dhënë sinjale optimiste për ecurinë e përpjekjeve diplomatike, duke lënë të hapur edhe mundësinë e një takimi me homologun rus, Vladimir Putin. Gjatë një komunikimi me gazetarët në Manila të Filipineve, Trump deklaroi se beson që palët mund të afrohen drejt një zgjidhjeje që do t’i jepte fund konfliktit të përgjakshëm.
“Unë mendoj se jemi shumë pranë përfundimit të kësaj çështjeje”, u shpreh presidenti amerikan. Trump tërhoqi vëmendjen edhe te kostoja e rëndë njerëzore e luftës, duke theksuar se përplasjet ushtarake vazhdojnë të shkaktojnë mijëra viktima. Ai përmendi një shifër prej 32 mijë të vdekurish vetëm gjatë muajit të kaluar, pa dhënë detaje të mëtejshme mbi burimin e këtyre të dhënave. “E imagjinoni dot këtë? Çdo muaj, 32 mijë vetëm muajin e kaluar”, deklaroi ai. Një tjetër çështje e ngritur gjatë bashkëbisedimit me gazetarët ishte mundësia e kontakteve të drejtpërdrejta mes Uashingtonit dhe Moskës.
I pyetur nëse do të ishte i gatshëm të zhvillonte një takim të posaçëm me presidentin rus, Vladimir Putin, Trump nuk e përjashtoi një skenar të tillë. “Nuk e di, por do ta bëja. Është e mundur. Do ta bëj”, tha presidenti amerikan. Deklaratat e tij tregojnë se administrata amerikane vijon ta konsiderojë rrugën diplomatike si një mundësi për t’i dhënë fund luftës, ndërsa një takim i mundshëm mes dy presidentëve mund të shërbejë si pjesë e këtyre përpjekjeve.
Megjithatë, optimizmi i Trump nuk shoqërohet ende me një marrëveshje konkrete mes Moskës dhe Kievit. Dallimet mes palëve mbeten një pengesë për arritjen e paqes, ndërsa mbetet e paqartë nëse kontaktet diplomatike do të prodhojnë rezultate në të ardhmen e afërt. Për momentin, deklaratat e presidentit amerikan mbeten një sinjal politik për mundësinë e përfundimit të konfliktit, por jo një konfirmim se lufta është pranë mbylljes.
