Kryesore

“Lufta” Rama-Veliaj/ Plarent Ndreca: Kryeministri donte të më largonte si avokat të kryebashkiakut. Më akuzon se e nxis të…

15:34 - 17.11.26 GSH Gazetar
GSH APP Download on Apple Store Get it on Google Play

Avokati i kryebashkiakut të Tiranës, Erion Veliaj, Plarent Ndreca, ka bërë të tjera deklarata lidhur me takimin e ministrit të Drejtësisë, Toni Gogu, me klientin e tij në qeli, si dhe për raportet me kryeministrin Edi Rama.

I ftuar në emisionin “Minuta e Parë” në News24, Ndreca përsëriti pretendimet se gjatë takimit në burg, ministri Gogu i ka bërë presion Veliajt për mandatin e kryebashkiakut, ndryshimin e avokatit dhe çështje që lidhen me procesin penal ndaj tij. Ai kërkoi një hetim institucional për të zbardhur rrethanat e vizitës, duke theksuar se Veliaj ka dokumentuar me shkrim atë që është diskutuar.

Ndërkohë, avokati foli edhe për pakënaqësinë e pretenduar të Ramës ndaj qëndrimit të tij si këshilltar ligjor i Veliajt. Sipas Ndrecës, kryeministri ka shprehur pakënaqësi pasi e konsideron atë si personin që nxit kryebashkiakun të shkëputet politikisht prej tij.

“Ajo që di unë është pakënaqësia e Ramës për qëndrimin tim, ku sipas tij unë e nxis Veliajn që të pavarësohet nga Rama. E para, nuk kam pse jap shpjegime për atë që diskutoj me klientin tim. Kjo është e pavarur nga bindjet e mia politike apo pozicioni im politik dhe nuk ka asnjë arsye, pavarësisht nëse e kam bërë apo nuk e kam bërë. Të vërtetën e dimë unë, klienti im dhe kolegët e mi britanikë dhe amerikanë”, u shpreh Ndreca.

Ai shtoi se nuk ka dijeni për synime të tjera të kryeministrit, përveç pretendimit se Rama ka dashur ta largojë nga roli i këshilltarit ligjor të Veliajt.

“Synimet e zotit Rama për të më larguar mua si këshilltar ligjor i Veliajt, përveç kësaj që më është thënë, nuk di tjetër. Por nuk është e vërtetë, sepse Veliaj ka gjithë kapacitetin të marrë vendime vetë dhe të mos pyesë askënd. Ai merr vendimet dhe është i qartë për atë që bën”, deklaroi avokati.

Ndreca theksoi se komunikimi me klientin e tij është pjesë e marrëdhënies profesionale mes avokatit dhe të mbrojturit, duke kundërshtuar çdo pretendim se ai ndikon në vendimmarrjen politike të kryebashkiakut.


Shfaq Komentet (0)

Shkruaj nje koment

Your email address will not be published. Required fields are marked *

* *

This site uses Akismet to reduce spam. Learn how your comment data is processed.