Beogradi lëshon urdhër-arrest për ish-nënkryetarin e Listës Serbe, Milan Radoiçiç
Gjykata e Lartë në Beograd ka lëshuar urdhër-arrest për Milan Radoiçiçin, ish-nënkryetarin e Listës Serbe, duke vendosur gjithashtu masën e sigurisë “arrest me burg”. Vendimi erdhi pasi ai nuk përmbushi detyrimin ligjor për t’u paraqitur në polici më 15 nëntor, në kuadër të masave të vendosura ndaj tij për çështjen e sulmit të armatosur në Banjskë të Kosovës.
Sipas konfirmimit të Gjykatës së Lartë në Beograd, Radoiçiç duhej të paraqitej në komisariatin e Savski Venacit për të dëshmuar se vijonte të qëndronte në adresën e deklaruar të banimit. Ky detyrim ishte pjesë e masave të sigurisë që gjykata kishte caktuar gjatë procedimit penal ndaj tij.
Deri më tani, ish-zyrtari i Listës Serbe kishte respektuar paraqitjet periodike në polici, të cilat kryheshin dy herë në muaj, më datat 1 dhe 15. Herën e fundit ai ishte paraqitur më 1 nëntor, ndërsa komisariati kishte informuar gjykatën për këtë veprim përmes një shkrese të datës 4 nëntor.
Mosrespektimi i detyrimit të radhës, më 15 nëntor, ka sjellë tashmë reagimin e autoriteteve gjyqësore, të cilat kanë vendosur ashpërsimin e masës së sigurisë dhe lëshimin e urdhër-arrestit.
Më herët, Gjykata e Lartë kishte bërë të ditur se po ndiqte zbatimin e masave të vendosura ndaj Radoiçiçit dhe se, në koordinim me institucionet përgjegjëse, do të ndërmerrte hapat e nevojshëm në përputhje me ligjin.
Ndërkohë, pasaporta e tij vijon të mbahet pranë Gjykatës së Lartë në Beograd, si pjesë e kufizimeve të vendosura gjatë hetimit për ngjarjet e Banjskës.
Hetimet për sulmin në Banjskë
Milan Radoiçiç është nën hetim për përfshirjen e dyshuar në sulmin e armatosur të 24 shtatorit 2023 në Banjskë, në veri të Kosovës. Ngjarja u shënua nga përplasjet mes një grupi të armatosur serb dhe Policisë së Kosovës, duke përfunduar me katër viktima: një efektiv policie dhe tre pjesëtarë të grupit të armatosur.
Rasti i Banjskës mbetet një nga ngjarjet më të rënda të sigurisë në veri të Kosovës, ndërsa roli i dyshuar i Radoiçiçit në organizimin dhe zhvillimin e sulmit është në qendër të procedimeve penale.
Keni një histori? Denonco anonimisht, identiteti juaj mbrohet.
Denonco



