Sipas raportimeve të gazetës italiane “La Gazzetta dello Sport”, Juventusi është i interesuar për transferimin e sulmuesit amerikan Folarin Balogun gjatë afatit kalimtar të janarit.

Për ta realizuar këtë transferim, drejtuesit e “Zonjës së Vjetër” po shqyrtojnë mundësinë që në negociata të përfshihet edhe Edon Zhegrova.

Reprezentuesi i Kosovës iu bashkua Juventusit në verën e vitit 2025 nga Lille, për një shumë prej 15.5 milionë eurosh, por deri tani nuk ka arritur të sigurojë hapësirën e dëshiruar në skuadrën italiane.

Minutazhi i kufizuar ka bërë që e ardhmja e tij në Torino të vihet në pikëpyetje, ndërsa Monaco shihet si një destinacion i mundshëm për vazhdimin e karrierës.

Nga ana tjetër, Juventusi synon të përforcojë repartin ofensiv me Balogunin, i cili është një nga emrat që po shqyrtohen për afatin kalimtar dimëror.

Megjithatë, për momentin bëhet fjalë vetëm për një skenar të raportuar nga mediat italiane dhe nuk ka konfirmim për një marrëveshje mes dy klubeve.

Mbetet të shihet nëse negociatat do të konkretizohen gjatë janarit dhe nëse Zhegrova do të largohet nga Juventusi vetëm një vit e gjysmë pas transferimit të tij në Torino.