Gjermania do t’i japë Ukrainës një tjetër paketë ndihme ushtarake me vlerë 300 milionë dollarë, e përqendruar te forcimi i mbrojtjes ajrore, në një kohë kur Rusia ka shtuar sulmet ndaj infrastrukturës energjetike ukrainase, në prag të dimrit.
Paketa u bë e ditur të martën nga ministri gjerman i Mbrojtjes, Boris Pistorius, përpara takimit të ministrave të Mbrojtjes të Bashkimit Evropian në Bruksel.
Kontributi gjerman do të jepet në kuadër të nismës PURL (Lista e Nevojave të Prioritizuara të Ukrainës), përmes së cilës vendet aleate financojnë blerjen e armëve amerikane për Ukrainën. Në këtë paketë, Gjermania po bashkëpunon me Norvegjinë.
“Rusia po shton sulmet e saj ajrore, sepse nuk po arrin përparim në fushën e betejës”, deklaroi Pistorius, duke theksuar se vendet që mbështesin Kievin duhet të vazhdojnë t’i ofrojnë ndihmë të shpejtë dhe efektive, veçanërisht për mbrojtjen nga sulmet ajrore.
Ndihma përfshin raketa të drejtuara për sistemet e mbrojtjes ajrore Patriot, si dhe sisteme IRIS-T dhe raketa për to, të cilat Gjermania i kishte njoftuar edhe më herët.
Pistorius bëri të ditur gjithashtu se Berlini po përgatitet të integrojë raketat IRIS-T në sistemet norvegjeze të mbrojtjes ajrore NASAMS (Sistemet Kombëtare të Avancuara të Raketave Tokë-Ajër).
Ministri gjerman theksoi se mbështetja për Ukrainën nuk duhet parë si çështje bamirësie, por si pjesë e sigurisë së Evropës dhe e përpjekjeve për të ndalur presidentin rus, Vladimir Putin.

