Tuesday / November 17 / 2026
Revista Monitor Logo
hamburger menu icon

mbyll

close icon
Ads
Bota Lajmet Kryesore

Sulm kibernetik në 178 faqe globale, mes tyre CNN dhe Zoom, synon vjedhjen e të dhënave

Share Share Icon

Një sulm kibernetik në shkallë të gjerë ka ekspozuar vizitorët e faqeve të internetit të 178 organizatave në mbarë botën ndaj programeve keqdashëse, me synimin për të vjedhur kriptomonedha, të dhëna të kartave bankare dhe për të infektuar pajisjet Apple. Mes organizatave të prekura janë CNN, Zoom, HSBC, Equifax, Salesforce, IKEA dhe BBC, ndërsa sulmi ka përfshirë sektorë të ndryshëm, nga financat dhe teknologjia te media dhe tregtia me pakicë.

Sulmi është realizuar përmes Optimizely, një platformë që përdoret nga kompanitë për optimizimin, testimin dhe personalizimin e faqeve të internetit. Sulmuesit shfrytëzuan një cenueshmëri në produktin Experimentation të platformës për të injektuar kode JavaScript të paautorizuara në projektet e disa klientëve. Përmes kësaj metode, kodi keqdashës u shpërnda te vizitorët e faqeve që përdornin shërbimin, pa qenë e nevojshme që secila kompani të sulmohej drejtpërdrejt.

Sipas Reuters, studiuesi i sigurisë kibernetike Scott Helme identifikoi skriptet keqdashëse në faqet e 178 organizatave. Kodi ishte projektuar për të zëvendësuar adresat e pagesave me kriptomonedha me adresa të kontrolluara nga sulmuesit, për të regjistruar të dhënat e kartave bankare gjatë plotësimit të formularëve të pagesës, si dhe për të vjedhur skedarët e identifikimit të shfletuesit (cookies) dhe pamje të ekranit të përdoruesve.

Një tjetër objektiv i sulmit ishin pajisjet Apple. Skriptet përfshinin kode shfrytëzimi që synonin sistemin operativ iOS, përmes mjeteve Coruna dhe DarkSword, të cilat mund të përdoren për të shfrytëzuar dobësi të sigurisë në iPhone dhe iPad. Studiuesit kanë identifikuar gjithashtu prova të transaksioneve me kriptomonedha drejt kuletave të kontrolluara nga sulmuesit, megjithëse përmasat e plota të dëmit financiar nuk janë përcaktuar.

Optimizely konfirmoi se një palë e paautorizuar kishte shfrytëzuar një cenueshmëri në produktin Experimentation për të shtuar kod keqdashës në projektet e disa klientëve. Kompania deklaroi se kishte korrigjuar cenueshmërinë, hequr kodin e injektuar dhe marrë masa shtesë për sigurinë e llogarive të prekura.

Ndërkohë, Salesforce konfirmoi se po hetonte ndryshimet e paautorizuara në skriptet e Optimizely dhe i kishte çaktivizuar ato si masë paraprake. Equifax deklaroi se kishte ndërprerë përdorimin e platformës dhe nuk kishte gjetur prova për komprometimin e sistemeve të veta.

Nuk është përcaktuar ende numri i përdoruesve që mund të jenë prekur nga sulmi apo nëse të gjitha përpjekjet për vjedhjen e të dhënave kanë qenë të suksesshme.

Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.

Leave a Reply

Your email address will not be published. Required fields are marked *

Ekskluzive Monitor Top 1,000

Publikohen për herë të parë treguesit financiarë të 1000 kompanive më të mëdha në vend. Renditja e grupeve kryesore!

Eksploro Top List
Live Now

Lajme të Ngjashme

Projektligji, rritet kufiri i përgjegjësisë për dëmet nga aksidentet

Ministria e Financave ka hedhur për konsultim publik projektligjin e ri “Për sigurimin e detyrueshëm në sektorin e transportit”. Ligji i ri do të s...

8 hours më parë 4 Min Lexim

Euro arrin rekord të ri poshtë 90.5 lekëve

Kursi i këmbimit Euro-Lek ka zbritur në një minimum të ri historik ditën e sotme. Sipas kursit zyrtar të këmbimit të Bankës së Shqipërisë, monedha ...

8 hours më parë 3 Min Lexim
Ads
collaps icon

Rrisni limitin e artikujve në 400 në muaj FALAS! Regjistrohu Falas!

Rrisni limitin e artikujve në 400 në muaj FALAS!

Si përdorues i paregjistruar, mund të lexoni vetëm 200 artikuj në muaj. Mund ta rrisni këtë limit duke krijuar një llogari FALAS në faqen tonë.

Regjistrohu FALAS!