Jose Mourinho ka zbuluar arsyet që e shtynë të largohej nga Real Madridi në vitin 2013, duke theksuar se vendimi i tij ishte marrë nga dashuria për klubin dhe bindja se në atë periudhë skuadra kishte nevojë për një profil tjetër trajneri.

Trajneri portugez foli për këtë vendim gjatë ceremonisë së organizuar nga Shkolla e Diplomuar e Real Madridit – Universiteti Evropian, e mbajtur të martën në kompleksin stërvitor të klubit, ku iu drejtua studentëve të pranishëm.


“Në vitin 2013 mund të kisha qëndruar. Por u largova nga dashuria për klubin dhe sepse mendoja se në atë kohë skuadra nuk kishte nevojë për dikë me profilin tim”, deklaroi Mourinho.

Ai gjithashtu theksoi se madhështia e Real Madridit nuk përcaktohet vetëm nga trofetë e fituar, por edhe nga parimet dhe sjellja e klubit në sport dhe në shoqëri.

Mourinho, i cili është rikthyer në Bernabeu 13 vjet pas periudhës së tij të parë në krye të madrilenëve, u shpreh se koha e kaluar larg klubit i ka mundësuar ta kuptojë edhe më mirë mënyrën se si Real Madridi perceptohet jashtë Spanjës.

Portugezi e përshkroi largimin e vitit 2013 si një vendim të bazuar në nevojat e skuadrës në atë moment, e jo si pasojë e mungesës së dashurisë apo lidhjes me klubin madrilen.

Gjatë fjalimit të tij, Mourinho foli edhe për vështirësitë që shoqërojnë profesionin e trajnerit, veçanërisht për vetminë dhe përgjegjësinë që mbart kjo pozitë.

“Edhe pse ke një staf mbështetës pranë vetes, trajneri është gjithmonë i vetëm dhe kjo është e vështirë. Duhet të dish t'i fshehësh dobësitë e tua”, u shpreh ai.

Në fund, Mourinho kujtoi edhe lidhjen e babait të tij me historinë e Real Madridit, duke treguar për admirimin që ai kishte për legjendën Alfredo Di Stefano.

Ai përmendi gjithashtu një ndeshje nderimi për Paco Genton në “Santiago Bernabeu”, në të cilën Eusebio kishte luajtur me fanellën e Real Madridit. /Telegrafi/