Departamenti Amerikan i Shtetit ka miratuar një shitje të mundshme të sistemeve raketore HIMARS për Shqipërinë, në një paketë ushtarake me vlerë rreth 210 milionë dollarë. Marrëveshja parashikon blerjen e dy sistemeve M142 HIMARS, së bashku me raketa me precizion të lartë dhe pajisje mbështetëse, për të forcuar kapacitetet mbrojtëse të Shqipërisë si vend anëtar i NATO-s.
Paketa përfshin gjashtë kontejnerë me raketa M31A2 GMLRS Unitary dhe gjashtë kontejnerë me raketa M30A2 GMLRS Alternative Warhead. Përveç raketave dhe platformave HIMARS, janë përfshirë tetë sisteme taktike për drejtimin e artilerisë dhe dy automjete ushtarake Humvee. Pajisjet e tjera të përfshira janë sisteme komunikimi, radio taktike, pajisje navigimi, mjete logjistike, pjesë këmbimi dhe pajisje për mirëmbajtjen e sistemeve.
Paketa përfshin gjithashtu komponentë shërbimi: trajnim për personelin, asistencë teknike dhe mbështetje logjistike të nevojshme për operimin dhe mirëmbajtjen e sistemeve. Financimi i blerjes pritet të realizohet përmes programit amerikan të Financimit Ushtarak të Jashtëm (Foreign Military Financing). Kontraktori kryesor i parashikuar për këtë shitje do të jetë kompania amerikane Lockheed Martin.
Sipas Departamentit Amerikan të Shtetit, qëllimi i shitjes është forcimi i sigurisë së një aleati të NATO-s dhe rritja e aftësisë së Shqipërisë për t’u përgjigjur kërcënimeve aktuale dhe të ardhshme, duke përmirësuar kapacitetet për goditje me precizion në distanca të gjata. Zbatimi i programit parashikon gjithashtu udhëtime periodike në Shqipëri të përfaqësuesve të qeverisë amerikane dhe të kompanisë kontraktore për menaxhimin e programit, instalimin e pajisjeve dhe trajnimin e personelit.
Departamenti i Shtetit thekson se miratimi i referohet një shitjeje të mundshme dhe nuk nënkupton se kontrata përfundimtare është nënshkruar apo se sistemet janë dorëzuar.
