Ambasada Amerikane ngre alarmin, paralajmërohen sulme terroriste gjatë festave të fundvitit
Ambasada e Shteteve të Bashkuara në Tiranë ka publikuar një njoftim të posaçëm sigurie për qytetarët amerikanë që ndodhen në Evropë, duke u kërkuar të tregojnë kujdes të shtuar gjatë sezonit të festave të fundvitit.
Në paralajmërimin e publikuar më 18 nëntor 2026, autoritetet amerikane ngrenë shqetësimin për mundësinë e sulmeve terroriste dhe akteve kriminale në ambiente publike, veçanërisht në vendet ku pritet të ketë grumbullime të mëdha njerëzish.
Sipas njoftimit, objektiva të mundshëm mund të jenë tregjet festive, qendrat tregtare, stacionet dhe nyjet e transportit, vendet e adhurimit fetar, zonat turistike dhe hapësirat e tjera publike që frekuentohen nga numër i madh vizitorësh.
Ambasada thekson se kërcënimi mund të vijë si nga organizata terroriste, ashtu edhe nga individë që veprojnë të vetëm. Këto sulme, sipas paralajmërimit, mund të ndodhin me pak ose aspak sinjalizim paraprak, ndaj qytetarëve amerikanë u kërkohet të mos neglizhojnë masat e sigurisë personale.
Protestat, grevat dhe kërcënimet për bomba, rrezik për udhëtimet
Përveç rrezikut të mundshëm të sulmeve, autoritetet amerikane paralajmërojnë edhe për ndërprerje të udhëtimeve dhe aktiviteteve të përditshme në disa vende evropiane.
Në njoftim thuhet se gjatë muajve të fundit janë regjistruar më shpesh protesta dhe greva, të cilat mund të ndikojnë në funksionimin e transportit publik dhe në lëvizjen e udhëtarëve.
Një tjetër shqetësim lidhet me kërcënimet e rreme për bomba, të cilat gjatë muajit nëntor kanë prekur aviacionin civil në disa vende të Evropës, duke shkaktuar vonesa dhe ndërprerje të fluturimeve.
Për këtë arsye, qytetarëve amerikanë që planifikojnë të udhëtojnë gjatë festave u rekomandohet të ndjekin vazhdimisht zhvillimet në mediat lokale dhe të informohen paraprakisht për situatën në destinacionet ku do të qëndrojnë.
Apeli i Ambasadës Amerikane: Ndiqni udhëzimet e autoriteteve
Në këshillat e saj për sigurinë, Ambasada Amerikane u kërkon qytetarëve të tregojnë vëmendje ndaj mjedisit përreth, veçanërisht në zonat turistike dhe aktivitetet me pjesëmarrje të lartë.
Gjithashtu, rekomandohet respektimi i udhëzimeve të policisë dhe shërbimeve të emergjencës, si dhe shmangia e situatave që mund të paraqesin rrezik për sigurinë personale.
Në fund të njoftimit, ambasada rikujton rëndësinë e regjistrimit në programin amerikan Smart Traveler Enrollment Program (STEP). Përmes këtij mekanizmi, shtetasit amerikanë që udhëtojnë ose jetojnë jashtë vendit mund të marrin përditësime dhe njoftime zyrtare për sigurinë në destinacionet ku ndodhen.
Paralajmërimi vjen në prag të periudhës së festave të fundvitit, kur qytetet evropiane presin fluks të shtuar turistësh dhe aktivitetesh publike.
Alarm sigurie: Ambasada e SHBA-së në Tiranë, 18 nëntor 2026
Vendndodhja: Në të gjithë Evropën
Ngjarja: Me afrimin e sezonit të festave, qytetarët amerikanë këshillohen të qëndrojnë vigjilentë ndaj mjedisit përreth dhe të tregojnë kujdes për sigurinë personale, si dhe të jenë të vetëdijshëm për situatat që mund të paraqesin rrezik.
Grumbullimet e mëdha të njerëzve dhe aktivitetet publike mund të përbëjnë objektiva të mundshëm për grupet terroriste dhe kriminelët. Terroristët, përfshirë edhe individë që veprojnë të vetëm, mund të kryejnë sulme me pak ose aspak paralajmërim, duke shënjestruar vende turistike si tregjet, nyjet e transportit, qendrat tregtare, vendet e adhurimit fetar dhe hapësira të tjera publike.
Qytetarët amerikanë këshillohen të tregojnë kujdes të shtuar gjatë festivaleve dhe aktiviteteve festive, si dhe në vende të tjera ku ka grumbullime të mëdha njerëzish. Vizitorët në zonat turistike të mbipopulluara dhe të frekuentuara duhet t’i kushtojnë vëmendje të veçantë mjedisit përreth dhe të ndjekin gjithmonë udhëzimet e policisë dhe të autoriteteve të emergjencave.
Ndërprerjet e udhëtimeve dhe të jetës së përditshme mbeten të mundshme në të gjithë Evropën gjatë sezonit të festave. Grevat dhe protestat janë shënuar me frekuencë më të lartë gjatë muajve të fundit. Në nëntor, kërcënime të rreme për bomba kanë shënjestruar aviacionin civil në disa vende evropiane, duke shkaktuar ndërprerje të fluturimeve.
Amerikanët këshillohen të ndjekin lajmet lokale gjatë udhëtimeve jashtë vendit për festat, në mënyrë që të informohen mbi ngjarjet ose zhvillimet lokale që mund të shkaktojnë ndërprerje të transportit apo të jetës së përditshme.
Ne i inkurajojmë të gjithë qytetarët amerikanë që ndodhen jashtë vendit të regjistrohen në Programin e Regjistrimit të Udhëtarëve të Mençur (Smart Traveler Enrollment Program – STEP), për të marrë përditësimet më të fundit të sigurisë për destinacionet ku ndodhen.
Keni një histori? Denonco anonimisht, identiteti juaj mbrohet.
Denonco



