Reformat në sundimin e ligjit, lufta kundër korrupsionit dhe përmirësimi i lirisë së medias do të jenë prioritetet kryesore të Bashkimit Evropian ndaj qeverisë së re të Serbisë. Sipas Frederik Vesslau, këshilltar i Këshillit Evropian për Marrëdhënie me Jashtë (ECFR), kërkesa për t'u kthyer në dialogun me Kosovën pritet të vijë në një fazë të mëvonshme.
Ai e bëri këtë paralajmërim në një intervistë për Radion Evropa e Lirë, duke u ndalur te sfidat e shumës së re në Beograd. Në atë fazë, Beogradi do të duhet të dëshmojë një qasje konstruktive ndaj Kosovës, në procesin e ndërmjetësuar nga Bashkimi Evropian, theksoi Vesslau, ish-këshilltar i shefit të UNMIK-ut, Joachim Rucker.
Fitorja e Listës Serbe në zgjedhjet në Serbi përbën një moment historik dhe një mundësi për ndryshimin e kursit të vendit, pas 14 vjetësh të qeverisjes së Partisë Progresive Serbe (SNS), vlerësoi ai. Sipas tij, sfida e vërtetë për shumicën e re nuk është vetëm marrja e pushtetit, por përmbushja e premtimeve dhe zbatimi i reformave që shoqëria serbe pret.
Brukseli do t'i japë kohë shumicës së re të konsolidohet dhe të formojë institucionet. Por pret që qeveria e ardhshme të ndërmarrë hapa konkretë në forcimin e sundimit të ligjit, luftimin e korrupsionit dhe reformimin e sektorit të sigurisë, ka theksuar Vesslau. Këto fusha përbëjnë një pikë të përbashkët mes Listës Serbe dhe Bashkimit Evropian, ndërsa Brukseli është i gatshëm t'i ofrojë mbështetje qeverisë së re për zbatimin e tyre.
Sa i përket politikës së jashtme, Vesslau nuk pret që BE-ja t'i bëjë menjëherë presion qeverisë së re serbe për vendosjen e sanksioneve ndaj Rusisë apo për njohjen e Kosovës. Megjithatë, ai ka rikujtuar se këto çështje mbeten të rëndësishme për Brukselin dhe shumë prej shteteve anëtare të BE-së.
Duke folur për marrëdhëniet ndërmjet Kosovës dhe Serbisë, Vesslau ka thënë se qeveria e re në Beograd duhet të përfshihet në mënyrë konstruktive në procesin e ndërmjetësuar nga Bashkimi Evropian. Ai ka paralajmëruar se, pavarësisht se Brukseli nuk pritet të kërkojë rezultate të menjëhershme për Kosovën, në një fazë të mëvonshme do të jetë e domosdoshme ringjallja e dialogut dhe një qasje konstruktive nga të dyja palët.
“Shpresoj që në një moment të arrihet një zgjidhje që do t'u shërbente interesit të Serbisë dhe Kosovës, si dhe të gjithë rajonit”, ka deklaruar Vesslau. Bashkëpunëtori i ECfR ka shprehur gjithashtu shpresën se ndryshimi i pushtetit në Serbi mund të ndikojë pozitivisht edhe në marrëdhëniet midis Beogradit dhe Sarajevës. Sipas tij, një zhvillim i tillë do të kontribuonte në stabilitetin rajonal.
