Pas 25 vitesh në arrati, ekstradohet nga SHBA i dënuari për 3 vrasje në Shkodër
Pas më shumë se dy dekadash në arrati, Valentin Ftoni është ekstraduar nga Shtetet e Bashkuara të Amerikës drejt Shqipërisë. 52-vjeçari, i kërkuar nga autoritetet shqiptare që prej vitit 2001, është dënuar dy herë me nga 25 vite burg për tri vrasje të kryera në qarkun e Shkodrës.
Ekstradimi u realizua këtë të mërkurë, më 18 nëntor 2026, nga Nju Jorku, pas përfundimit të operacionit të koduar “GLOBE”, i zhvilluar në bashkëpunim mes Policisë së Shtetit dhe agjencive ligjzbatuese amerikane.
Ftoni ishte arrestuar më 8 tetor 2026 në Nju Jork, pas një pune të gjatë hetimore dhe koordinimi ndërkombëtar. Sipas Policisë së Shtetit, gjatë qëndrimit në SHBA ai kishte arritur të fshihej duke përdorur tri identitete të falsifikuara: Valentin Bujaj, Parim Hajredini, me dokumente identifikimi kosovare, si dhe Alexander Campusano, me identitet të një vendi të Amerikës Qendrore.
Pas përfundimit të procedurave të ekstradimit, 52-vjeçari iu dorëzua autoriteteve shqiptare për vijimin e veprimeve ligjore dhe ekzekutimin e vendimeve të dhëna ndaj tij.
Dy vendime gjykate, nga 25 vite burg për tri vrasje
Sipas të dhënave të Policisë së Shtetit, Ftoni është dënuar fillimisht më 28 janar 2001 nga Gjykata e Shkodrës me 25 vite burgim, pasi është shpallur fajtor për vrasjen e dy personave, Gj. M. dhe A. M.
Ngjarja e rëndë kishte ndodhur më 19 shtator 2000, në fshatin Ças të Shkodrës, ndërsa motivi i krimit ishte gjakmarrja. Për këtë ngjarje, ai u dënua për vrasje me paramendim, të kryer në bashkëpunim, si dhe për veprat penale që lidhen me armëmbajtjen pa leje.
Një tjetër vendim penal ndaj tij u dha më 18 nëntor 2008. Gjykata e Shkodrës e dënoi sërish me 25 vite burgim, këtë herë për vrasjen e shtetasit G. T., ngjarje e ndodhur më 12 gusht 2001 në Shkodër.
Edhe në këtë rast, Ftoni u shpall fajtor për vrasje me paramendim, të kryer në bashkëpunim, si dhe për veprat penale që lidhen me mbajtjen pa leje të armëve dhe municionit.
Operacioni “GLOBE”, bashkëpunim mes autoriteteve shqiptare dhe amerikane
Policia e Shtetit bën me dije se finalizimi i ekstradimit u bë i mundur përmes bashkëpunimit me agjencitë federale amerikane, të koordinuara nga DSS/OCIU pranë Ambasadës së SHBA-së në Tiranë.
Në procesin e arrestimit dhe dorëzimit të shtetasit shqiptar u përfshinë edhe strukturat amerikane ICE-ERO dhe DSS/OCIU.
Sipas autoriteteve shqiptare, rasti i Valentin Ftonit është një tjetër rezultat i bashkëpunimit ndërkombëtar në identifikimin, lokalizimin dhe kapjen e personave të shpallur në kërkim, të cilët tentojnë t’u shmangen drejtësisë duke përdorur identitete të rreme dhe duke u vendosur jashtë vendit.
Me mbërritjen e tij në Shqipëri, pas 25 vitesh në kërkim, Ftoni do të përballet me ekzekutimin e dy vendimeve të dënimit, që në total parashikojnë 50 vite burgim.
Keni një histori? Denonco anonimisht, identiteti juaj mbrohet.
Denonco



