Ish-kryebashkiaku socialist i Memaliajt, Gjolek Guci, është dënuar me 1 vit e 4 muaj burg nga Gjykata e Posaçme (GJKKO), pasi u shpall fajtor për veprën penale “Shkelja e barazisë së pjesëmarrësve në tendera apo ankande publike”, kryer në bashkëpunim.
Në të njëjtën çështje është dënuar edhe ish-nënkryetarja e Bashkisë Memaliaj, Edmonda Harizi, me 8 muaj burg.
Vendimi u dha këtë të mërkurë nga trupa gjykuese e përbërë nga gjyqtaret Flora Hajredinaj, Etleva Deda dhe Engjëllushe Tahiri.
Fillimisht, Guci u dënua me 2 vite burg, por përfitoi uljen me një të tretën e dënimit për shkak të gjykimit të shkurtuar, duke u dënuar përfundimisht me 1 vit e 4 muaj heqje lirie. Gjykata vendosi gjithashtu t’i heqë të drejtën për të ushtruar funksione publike për një periudhë 5-vjeçare.
Ndërsa Harizi u dënua fillimisht me 1 vit burg, por pas aplikimit të gjykimit të shkurtuar dënimi përfundimtar u reduktua në 8 muaj burg. Edhe asaj iu hoq e drejta për të ushtruar funksione publike për 5 vite.
Akuzat
Çështja ndaj ish-kryebashkiakut të Memaliajt lidhet me procedurën e prokurimit të vitit 2021 për ndërtimin e Ujësjellësit Rajonal, që parashikonte furnizimin me ujë të pijshëm të qytetit të Memaliajt dhe tetë fshatrave përreth: Vasjar, Iliras, Qesarat, Anë-Vjosë, Toç, Lulëzim, Zhulaj dhe Krahës.
Fondi i parashikuar për këtë investim ishte 493.183.572 lekë, ose rreth 4.1 milionë euro.
Sipas hetimeve të Prokurorisë së Posaçme (SPAK), Gjolek Guci, në cilësinë e kryetarit të Bashkisë dhe titullarit të autoritetit kontraktor, në bashkëpunim me anëtarët e Komisionit të Vlerësimit të Ofertave, dyshohet se krijoi avantazhe dhe privilegje të padrejta për operatorë ekonomikë të caktuar.
Në qendër të hetimit ishte shpallja fituese e bashkimit të operatorëve ekonomikë “KEG” sh.p.k. dhe “ED Konstruksion” sh.p.k., të cilët, sipas SPAK, kishin mangësi në dokumentacionin e paraqitur, veçanërisht në përmbushjen e kritereve për kapacitetin teknik.
Një tjetër element i evidentuar nga hetuesit ishte përfshirja si nënkontraktor e kompanisë “Artreum Generation” sh.p.k.
Projekti i dhuruar dhe dyshimet për konflikt interesi
Sipas SPAK, më 21 shtator 2020, Gjolek Guci kishte nënshkruar një kontratë dhurimi me kompaninë “Artreum Generation”, e cila kishte përgatitur projektin për ndërtimin e ujësjellësit rajonal.
Prokuroria ka konstatuar se vlera e fondit të miratuar për investimin ishte e njëjtë me kostot e përcaktuara në projektin e dhuruar nga kjo kompani.
Megjithatë, e njëjta kompani u përfshi më pas si nënkontraktore e njërit prej bashkimeve të shpallura fituese të tenderit.
Sipas hetimeve, kjo situatë krijonte konflikt interesi, pasi “Artreum Generation” kishte dhuruar projektin dhe kishte hartuar specifikimet teknike të procedurës, ndërkohë që, sipas SPAK, nuk përmbushte kriteret ligjore për t’u pranuar si nënkontraktore.
Si nisën hetimet e SPAK?
Hetimi nisi pas një kallëzimi penal të Kontrollit të Lartë të Shtetit, të depozituar më 28 tetor 2024. Më 4 nëntor 2024 u regjistrua procedimi penal për veprën penale të shkeljes së barazisë së pjesëmarrësve në tendera apo ankande publike.
Në kuadër të hetimeve, SPAK mori të pandehur dhe dërgoi për gjykim katër persona:
-Gjolek Guci, ish-kryetar i Bashkisë Memaliaj.
-Edmonda Harizi, ish-nënkryetare e Bashkisë Memaliaj
-Feta Hoxha, ish-drejtor i Shërbimeve Publike në Bashkinë Memaliaj.
-Bersant Ylli, administrator i subjektit “Bersant Ylli”.
Të katërt akuzoheshin për veprën penale “Shkelja e barazisë së pjesëmarrësve në tendera apo ankande publike”, kryer në bashkëpunim, sipas neneve 258 dhe 25 të Kodit Penal.












