Ushtria izraelite ka nisur një operacion të ri ushtarak në pjesën qendrore të Rripit të Gazës, pavarësisht marrëveshjes së armëpushimit që hyri në fuqi në tetor të vitit 2025.
Operacioni po zhvillohet në zonat e Bureijit dhe Nuseiratit, pranë të ashtuquajturës “Vijë e Verdhë”. Sipas njoftimit të Koordinatorit të Aktiviteteve Qeveritare të Izraelit në Territoret Palestineze (COGAT), ndërhyrja ushtarake ka nisur në tri zona të përcaktuara me numrat 660, 661 dhe 666.
Autoritetet izraelite bëjnë me dije se objektivi i operacionit është goditja e infrastrukturës ushtarake të Hamasit. Ndërkohë, banorëve palestinezë u është kërkuar të qëndrojnë larg zonave të prekura deri në një njoftim të dytë.
Si pjesë e masave të sigurisë, do të mbyllen përkohësisht edhe disa segmente të rrugës Salah al-Din, një prej akseve kryesore që lidh veriun me jugun e Gazës.
Dëshmitarë të cituar nga agjencia Reuters raportojnë se tanke dhe automjete të blinduara izraelite kanë hyrë në zonë dhe kanë avancuar përgjatë kësaj rruge. Sipas tyre, kjo është hera e parë që mjete të tilla ushtarake shfaqen në këtë zonë që prej vendosjes së armëpushimit.
Ndërkohë, mjekët palestinezë kanë raportuar për tre persona të vrarë nga sulmet ajrore izraelite gjatë ditës. Një prej viktimave humbi jetën pranë zonës ku po zhvillohet operacioni, ndërsa dy të tjerët u vranë nga sulme në Deir al-Balah dhe në qytetin e Gazës.
Ushtria izraelite ka konfirmuar goditjen e objektivave të Hamasit në pjesën qendrore të Rripit të Gazës, por nuk ka dhënë detaje mbi kohëzgjatjen e operacionit.
Armëpushimi mes Izraelit dhe Hamasit hyri në fuqi më 10 tetor 2025, në kuadër të planit të propozuar nga presidenti amerikan Donald Trump. Megjithatë, gjatë kësaj periudhe janë raportuar vazhdimisht sulme dhe viktima nga të dyja palët.
Sipas autoriteteve shëndetësore palestineze, të paktën 1 600 palestinezë janë vrarë që prej hyrjes në fuqi të armëpushimit, ndërsa ushtria izraelite ka raportuar humbjen e pesë ushtarëve.
Izraeli pretendon se Hamasi po riorganizohet dhe po rindërton kapacitetet e tij ushtarake. Nga ana tjetër, Hamasi akuzon Izraelin për shkelje të marrëveshjes së armëpushimit dhe pengim të zbatimit të saj.
Lufta në Gaza nisi më 7 tetor 2023, pas sulmit të Hamasit ndaj Izraelit, ku u vranë rreth 1 200 persona. Sipas të dhënave të autoriteteve palestineze, që prej fillimit të ofensivës ushtarake izraelite në Rripin e Gazës, numri i palestinezëve të vrarë ka kaluar 74 mijë.

