Pse BE-ja po i propozon Ukrainës 45 miliardë euro kredi?
Komisioni Evropian ka propozuar një kredi prej 45 miliardë eurosh për Ukrainën, me qëllim që ta ndihmojë vendin të përballojë krizën e pritshme financiare në vitin 2027 dhe të forcojë kapacitetet e tij mbrojtëse, në kohën kur Rusia po vazhdon sulmet e pandërprera.
Presidentja e Komisionit Evropian, Ursula von der Leyen, duke prezantuar planin për financimin e Ukrainës në vitin 2027, tha se kjo është mënyra më e mirë për t'i dhënë Kievit një pozitë më të fortë në negociatat e mundshme për përfundimin e luftës.
Ajo theksoi se Ukraina do të duhet ta kthejë kredinë vetëm pasi Rusia të paguajë për dëmet që i ka shkaktuar vendit, raporton The Guardian.
Von der Leyen shprehu bindjen se të 27 shtetet anëtare të BE-së do ta mbështesin këtë plan, ndonëse katër vende të Evropës Qendrore dhe Lindore kanë bërë të ditur se nuk synojnë të marrin pjesë në këtë rund të financimit.
Presidenti ukrainas, Volodymyr Zelenskyy, mirëpriti propozimin dhe kërkoi miratimin e tij sa më të shpejtë, duke thënë se mbështetja e fortë për Ukrainën është sinjali më i mirë ndaj Rusisë se lufta duhet të përfundojë.
Muajin e kaluar, Zelenskyy kishte bindur liderët evropianë se vendi i tij përballet me një mungesë prej 70 miliardë eurosh në financimin për vitin 2027. BE-ja është zotuar të mbulojë 45 miliardë euro, ndërsa pjesën tjetër pritet ta sigurojnë aleatët e tjerë të Ukrainës.
Kredia e propozuar do të ndahet në dy pjesë: 25 miliardë euro për blerjen e armëve dhe 20 miliardë euro për nevoja civile, përfshirë financimin e shërbimeve thelbësore si shkollat dhe spitalet.
Komisioneri i BE-së për Mbrojtjen, Andrius Kubilius, tha se shpenzimet ushtarake të Ukrainës po orientohen gjithnjë e më shumë drejt dronëve. Sipas tij, Ukraina pret që Rusia të përdorë 10 milionë dronë gjatë këtij viti dhe 20 milionë të tjerë në vitin 2027.
Ndërkohë, Sllovakia, Çekia, Hungaria dhe Bullgaria kanë deklaruar se nuk synojnë të marrin pjesë në financimin e ri për Ukrainën. Kjo ka nxitur reagimin e kancelarit gjerman, Friedrich Merz, i cili ka paralajmëruar se do të bllokojë buxhetin shtatëvjeçar të BE-së nëse të gjitha vendet nuk përfshihen në mbështetjen për Ukrainën.
Përveç vendeve anëtare, BE-ja po kërkon mbështetje financiare edhe nga aleatët e Ukrainës jashtë unionit, si Norvegjia, Mbretëria e Bashkuar dhe Kanadaja, me synimin që këto vende të sigurojnë 25 miliardë euro gjatë vitit 2027.
Komisioni Evropian ka propozuar gjithashtu që vendet e G7-s që ofrojnë kredi të reja për Ukrainën të marrin garanci se ato mund të shlyhen nga fitimet e ardhshme të aseteve ruse të ngrira.
Ndërkaq, Zelenskyy ka vlerësuar ndihmën e Mbretërisë së Bashkuar, Kanadasë, Japonisë dhe Norvegjisë, duke thënë se përcaktimi i rregullave të qarta për ofrimin e ndihmës së mëtejshme, në bashkëpunim me BE-në, do ta forconte edhe më shumë mbështetjen për Ukrainën.















