Pas 14 orëve seancë maratonë, me 80 votat e socialistëve u miratua në parim në Kuvend buxheti për vitin 2027 prej 10 miliardë eurosh. Për socialistët, është rritje e investimeve publike dhe mbështetjes sociale, ndërsa nga deputetët e opozitës mori 25 vota kundër dhe u cilësua “kriminal”.
Opozita votoi kundër edhe për ligjet e paketës fiskale 2027, konkretisht për tatimin mbi të ardhurat i ndryshuar, me 80 vota pro dhe 25 kundër, për TVSH me 80 vota pro dhe 24 kundër, për procedurat tatimore 80 vota pro dhe 24 kundër, akcizat 80 vota pro dhe 25 kundër, si dhe ligji për strehimin social 79 vota pro, 1 abstenim (Greta Bardeli) dhe 25 kundër.
Për buxhetin, kritikat u vërtitën kryesisht te shpërndarja e parave, mungesa e konsultimit me bizneset dhe më shumë kosto për xhepat e qytetarëve.
Buxheti do të rikthehet edhe një herë në komisione për t’u shqyrtuar nen për nen. Në seancë pati edhe një incident të vogël me ndërprerjen e energjisë elektrike për disa çaste.




