LIVE/ Nis takimi historik në Kinë, Trump, Xi dhe Putin ulen për herë të parë në të njëjtën tryezë Presidentët e Shteteve të Bashkuara, Donald Trump, Kinës, Xi Jinping, dhe Rusisë, Vladimir Putin, kanë zhvilluar një takim trepalësh në Kinë, të cilin liderët e kanë cilësuar si historik dhe me rëndësi të veçantë për marrëdhëniet ndërkombëtare.
Gjatë fjalës së tij, presidenti amerikan Donald Trump vlerësoi mundësinë e këtij takimi, duke theksuar rëndësinë e dialogut mes fuqive të mëdha, edhe kur ato kanë mosmarrëveshje
“Jam i kënaqur që ky samit i APEC-ut na dha mundësinë për takimin e parë trepalësh mes Shteteve të Bashkuara, Kinës dhe Rusisë. Ne po bëjmë vërtet histori”, deklaroi Trump.
Ai falënderoi presidentin kinez Xi Jinping për mikpritjen, duke e cilësuar një nder rikthimin e tij në Kinë.
Trump theksoi se tre vendet kanë shumë çështje për të diskutuar dhe se, si presidentë të tri prej vendeve më të mëdha në botë, kanë një përgjegjësi të veçantë për të ruajtur dialogun konstruktiv.
“Shumë shpesh, liderët e mëparshëm kanë shmangur bisedimet me vendet me të cilat kishin mosmarrëveshje. Ne mendojmë të kundërtën”, u shpreh presidenti amerikan.
Ai nënvizoi më tej rëndësinë e komunikimit për arritjen e paqes: “Asnjëherë nuk është arritur paqja duke refuzuar mundësitë për angazhim dhe dialog”.
Nga ana tjetër, presidenti kinez Xi Jinping u bëri thirrje tri fuqive të mëdha që të bashkëpunojnë për përballimin e sfidave globale dhe ruajtjen e paqes e stabilitetit ndërkombëtar.
“Ndërveprimi pozitiv mes fuqive të mëdha nuk është çështje zgjedhjeje, por një domosdoshmëri”, deklaroi Xi.
Ai theksoi se bota nuk është më një bashkësi ishujsh të izoluar, por një hapësirë ku fatet e njerëzimit janë të ndërlidhura.
“Njerëzimi jeton në një ‘fshat global’ të vetëm, ku fati i secilit është i lidhur me atë të të tjerëve”, u shpreh presidenti kinez, duke shtuar se fuqitë e mëdha kanë “përgjegjësi të veçanta” në këtë realitet.
Xi nënvizoi se Kina ka promovuar marrëdhënie mes fuqive të mëdha të karakterizuara nga bashkëjetesa paqësore, stabiliteti i përgjithshëm dhe zhvillimi i balancuar, në dobi të vendeve të përfshira dhe të gjithë botës.
Duke iu referuar marrëdhënieve me Moskën dhe Uashingtonin, ai deklaroi se Pekini ka avancuar partneritetin e tij strategjik gjithëpërfshirës të koordinimit me Rusinë për një epokë të re, ndërsa ka kërkuar në mënyrë aktive ndërtimin e një marrëdhënieje konstruktive dhe strategjikisht të qëndrueshme me Shtetet e Bashkuara.
Presidenti kinez u bëri thirrje gjithashtu homologëve të tij që të nxjerrin mësime nga historia dhe të punojnë së bashku për përballimin e sfidave globale.
“Duhet të mësojmë nga historia. Vështirësitë zbulojnë përgjegjësinë e vërtetë”, citohet të ketë thënë Xi.
Ai theksoi se Kina, Rusia dhe SHBA-ja duhet të japin shembull për pjesën tjetër të botës, duke bashkëpunuar për paqen dhe stabilitetin ndërkombëtar.
Sipas agjencisë kineze të lajmeve Xinhua, Xi e cilësoi takimin e parë të këtij formati mes liderëve të tri vendeve si një ngjarje me “rëndësi historike dhe përparimtare”. Takimi trepalësh vijon ende, ndërsa pritet të publikohen detaje të tjera mbi diskutimet mes tre presidentëve.
Top Channel