Presidenti amerikan, Donald Trump, ka deklaruar se Shtetet e Bashkuara nuk do të lejojnë që Irani të zotërojë armë bërthamore. Deklarata u bë gjatë takimit historik trepalësh me kreun e shtetit rus Vladimir Putin dhe homologun kinez Xi Jinping, në Shenzhen të Kinës, ku në fokus janë siguria ndërkombëtare dhe kontrolli i armëve bërthamore.
“Ne nuk do ta lejojmë Iranin të ketë armë bërthamore”, deklaroi Trump, duke theksuar se tri fuqitë kanë një pozicion të veçantë për të diskutuar mënyrat e reduktimit të numrit të armëve bërthamore në botë.
Sipas presidentit amerikan, bashkëpunimi mes tre vendeve është jetik për të luftuar përhapjen e armëve bërthamore në shtete të tjera. Ai iu referua edhe Iranit, duke thënë:
“Kjo është ajo që po bëjmë në Iran”.
Gjatë deklaratave të tij, Trump foli edhe për luftën në Ukrainë, duke zbuluar se kishte zhvilluar më herët një diskutim të gjatë me presidentin rus për këtë konflikt. Ai u shpreh se beson që Putini dhe, siç shtoi, shpreson edhe pala tjetër, dëshirojnë t’i japin fund luftës.
“Unë mendoj se Putini dhe shpresoj edhe pala tjetër, do të donin t’i jepnin fund kësaj lufte”,deklaroi Trump.
Ndërkohë, Putin konfirmoi se konflikti në Ukrainë kishte zënë një vend të rëndësishëm në bisedimet trepalëshe. Sipas agjencisë ruse të lajmeve TASS, presidenti rus tha se me iniciativën e Trumpit, diskutimeve për Ukrainën iu kushtua një vëmendje e konsiderueshme.
Ai theksoi se të tria vendet kanë interesa të përbashkëta për zgjidhjen e konflikteve rajonale, përfshirë atë ukrainas.

