Barcelona nuk heq dorë nga Alessandro Bastoni, por transferimi i mbrojtësit italian duket shumë i vështirë. Sipas mediave spanjolle, drejtori sportiv Deco e vlerëson shumë lojtarin e Interit dhe e konsideron një përforcim ideal për skuadrën e Hansi Flick. Katalanasit mund të ofrojnë rreth 40 milionë euro, por kjo shifër konsiderohet e pamjaftueshme nga zikaltërit. Për më tepër, Bastoni ka shprehur dëshirën për të qëndruar në Milano, ndërsa palët kanë nisur bisedimet për rinovimin e kontratës. Kështu, një largim që në janar duket pothuajse i pamundur.

Ndërkohë, Interi po planifikon merkaton e ardhshme dhe ka piketuar dy emra të rëndësishëm: Alisson Becker të Liverpoolit dhe Frank Anguissa të Napolit. Portieri brazilian shihet si një alternativë me eksperiencë për repartin e portës, por pengesë mbetet paga e tij e lartë. Në krahun tjetër, Anguissa vlerësohet për forcën fizike dhe cilësitë në mesfushë, por për shërbimet e tij interesohen edhe Marseille dhe Juventusi.

Drejtuesit zikaltër po punojnë për të përforcuar skuadrën, ndërsa Barcelona duhet të bëjë llogaritë me vendosmërinë e Interit për të mbajtur një nga lojtarët më të rëndësishëm të prapavijës.

© BalkanWeb
Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb