Gjatë fjalës së saj në Kuvend, Nagavci ka thënë se pamjet nga kjo vizitë rikthejnë në vëmendje kohën e humbur dhe momentet familjare që nuk mund të rikuperohen.

Ajo ka theksuar se rasti i Krasniqit duhet të shërbejë edhe si reflektim për pasojat që mund të kenë vendimet politike në jetën e qytetarëve.

“Ato pamje duhet të na kujtojnë edhe diçka tjetër se vendimet politike nuk mbeten në dokumente, por dalin nga kjo sallë dhe ndikojnë drejtpërdrejt në jetën e njerëzve”, ka thënë ajo.

Nagavci e ka cilësuar Krasniqin si një figurë të rëndësishme të historisë së Kosovës, duke rikujtuar rolin e tij në periudha vendimtare të shtetndërtimit.

Në këtë kontekst, ajo ka kritikuar votimin e vitit 2015 për themelimin e Gjykatës Speciale, duke e cilësuar atë si një vendim të gabuar, pasojat e të cilit, sipas saj, po vërehen edhe sot.

“Votimi për themelimin e saj ishte gabim, pasojat e të cilit po i shohim edhe sot”, ka deklaruar Nagavci.

Në fund, ajo ka thënë se nga kjo përvojë duhet të nxirren mësime për mënyrën se si deputetët i ushtrojnë përgjegjësitë dhe detyrat e tyre parlamentare.