Gjashtë persona, mes tyre edhe shtetas shqiptarë, janë arrestuar në Belgjikë në kuadër të një hetimi për një organizatë ndërkombëtare të trafikut të kokainës, e dyshuar për transportimin e lëndës narkotike nga porti i Anversës drejt Mbretërisë së Bashkuar.
Të arrestuarit janë të moshës 25 deri në 38 vjeç. Gjatë operacionit, të zhvilluar të martën, u kryen gjithsej shtatë kontrolle, katër prej të cilave në Belgjikë, në Grimbergen, Jette dhe Ninove. Hetimi u realizua nga autoritetet belge në bashkëpunim me policinë spanjolle dhe Europol-in.
Gjatë kontrolleve u sekuestruan 21 pako kokainë, materiale për paketimin e drogës, një makinë për numërimin e parave, një sasi kanabisi e përgatitur për shitje, pajisje për ngritjen e një plantacioni kanabisi, dokumente identiteti të falsifikuara dhe një shumë parash.
Hetuesit kanë identifikuar gjithashtu 21 raste të transportimit të drogës, gjashtë prej të cilave janë zbuluar nga autoritetet dhe janë shoqëruar me sekuestrime.
Sipas hetimeve, organizata dyshohet se trafikonte kokainë nga Belgjika drejt Mbretërisë së Bashkuar, aktivitet nga i cili ka përfituar rreth 25 milionë euro.
Lënda narkotike mbërrinte përmes portit të Anversës dhe më pas mbahej për periudha të shkurtra në apartamente me qira në qytet dhe zonat përreth. Këto ambiente siguroheshin përmes platformave online të rezervimit dhe përdoreshin për ripaketimin e kokainës.
Më pas, droga vendosej në çanta sportive dhe transportohej me kamionë drejt Mbretërisë së Bashkuar. Hetimet kanë zbuluar edhe një lidhje të rrjetit me Spanjën, ku dyshohet se ndodhen disa prej anëtarëve të organizatës kriminale.


