Hungaria pritet të heqë veton për negociatat e anëtarësimit të Ukrainës në BE

20 Nëntor 2026 | 08:11

Hungaria pritet të heqë veton për hapjen e dy grupeve të fundit të negociatave të anëtarësimit të Ukrainës në Bashkimin Evropian. Vendimi pritet të formalizohet të premten, gjatë një takimi të ambasadorëve të vendeve anëtare të BE-së, bëjnë të ditur dy burime diplomatike për Euronews.

Sinjali për këtë ndryshim qëndrimi u dha nga András Bíró-Nagy, Sekretari i Shtetit i Hungarisë për Çështjet e BE-së në Zyrën e Kryeministrit, gjatë një diskutimi mbi zgjerimin, përpara mbledhjes së Këshillit të Çështjeve të Përgjithshme të mbajtur të enjten në Bruksel.

Budapesti ka bllokuar prej kohësh procesin e anëtarësimit të Ukrainës në BE, duke kundërshtuar hapjen e grupeve negociuese. Kjo veto ka penguar gjithashtu edhe përparimin e Moldavisë drejt anëtarësimit, pasi proceset e të dy vendeve mbeten të lidhura.

Ndryshimi i qëndrimit të Hungarisë nisi pas ardhjes në pushtet të Péter Magyar, i cili mposhti Viktor Orbán pas 16 vitesh në krye të qeverisë.

Ndërkohë, procesi negociues i Ukrainës ka shënuar përparim gradual. Grupi i parë negociues u hap në qershor, i dyti në korrik, ndërsa dy grupe të tjera në tetor.

Një zhvillim i rëndësishëm në përmirësimin e marrëdhënieve mes Kievit dhe Budapestit ishte edhe marrëveshja e arritur muajin e kaluar për të drejtat e pakicës etnike hungareze në Ukrainën perëndimore. Marrëveshja u miratua më pas edhe nga parlamenti ukrainas, duke krijuar kushte për zhbllokimin e procesit të integrimit evropian

Home Kryefaqja
Shiko në: YouTube
Lajme të Sugjeruara

Publikohen pamjet e shembjes së ndërtesës në Brooklyn, tetë viktima mes tyre dy fëmijë (VIDEO)

Një video e re, e publikuar nga Autoriteti i Transportit Metropolitan të Nju Jorkut (MTA), ka dokumentuar momentin tragjik kur një ndërtesë trekatëshe në Brooklyn...
08:02 | 20/11/2026

Problemet në sistemet teknologjike amerikane, Trump largon nga detyra drejtorin e sigurisë kibernetike

Presidenti i Shteteve të Bashkuara, Donald Trump, ka larguar nga detyra drejtorin kombëtar të sigurisë kibernetike, Sean Cairncross. Vendimi vjen në një kohë kur SHBA-ja...
07:53 | 20/11/2026

Në një moment tensionesh me Trump, Macron pret Kamala Harris në Paris

Presidenti francez, Emmanuel Macron, do të takohet këtë të premte në Paris me ish-zëvendëspresidenten e Shteteve të Bashkuara, Kamala Harris. Takimi zhvillohet në një kohë...
07:35 | 20/11/2026